Kyriakos Mitsotakis i mbijeton mocionit të mosbesimit, parlamenti grek e rrëzon me 157 vota! Çfarë deklaroi kryeministri

Mocioni i mosbesimit ndaj Qeverisë të kryeministrit grek  Kyriakos Mitsotakis, i paraqitur nga PASOK, SYRIZA, E Majta e Re dhe Kursi i Lirisë dhe 9 deputetë të pavarur, u rrëzua me 157 vota. Ndërsa pro mocioni votuan 136 deputetë.

Votimi u mbajt menjëherë pas përfundimit të fjalimit të kryeministrit Kyriakos Mitsotakis, i cili sulmoi opozitën duke folur për një “aleancë të të eturve për nihilizëm dhe mbi të gjitha për mungesën e ndonjë propozimi alternativ bindës”.

Kryeministri grek u shpreh i gatshëm për të vazhduar me ndryshimin e dispozitave për drejtimin e gjyqësorit, si dhe rishikimin e nenit 86 të ligjit për përgjegjësinë ministrore. Ai i bëri thirrje gjithashtu presidentit të PASOK-ut që të japë pëlqimin për përcaktimin kushtetues të vlerësimit në shtet dhe ndryshimin e nenit 16 për universitetet.

Po ashtu kryeministri Mitsotakis tha se në javët në vijim qeveria do të prezantojë programin e ri të armatimit të vendit për 12 vitet e ardhshme, ndërsa do të shpallë edhe rritjen e re të pagës minimale.

Nga 1 korriku ai tha se do të ketë 100 euro rritje për të gjithë personat me uniformë. Ai tha se politika ekonomike e qeverisë do të përfundojë në vitin 2027 dhe tha se në të njëjtin vit do të mbahen zgjedhjet për të rinovuar mandatin popullor për ND.