Drejtori i Juventusit i drejtohet Mottas: Jam i turpëruar që të zgjodha ty

Në një raportim të papritur, “La Gazzetta dello Sport” raporton se drejtori i Juventus, Cristiano Giuntoli, i ka thënë trajnerit Thiago Motta se ishte “i turpëruar që e kishte zgjedhur atë” për këtë post.

Burime të shumta pohojnë se vendimi është marrë, me drejtorin e “Sportitalia”, Alfredo Pedullá, që deklaron pasdite se Juve tashmë e ka informuar Mottan përmes telefonit se ai është shkarkuar.

Motta aktualisht ndodhet në Portugali me familjen e tij gjatë pushimit për detyrat ndërkombëtare, ndërsa pritet që Igor Tudor të mbërrijë në Torino këtë mbrëmje për të marrë drejtimin e ekipit.

Drejtori Giuntoli kishte mbështetur publikisht Mottan vetëm disa minuta pas humbjes 3-0 ndaj Fiorentinës, por situata është përkeqësuar gjatë javës së kaluar.

Sipas “La Gazzetta dello Sport”, takimi ballë për ballë me Mottan dhe kreun Maurizio Scanavino ka shkuar kaq keq, saqë Giuntoli madje ka thënë: “Jam i turpëruar që të kam zgjedhur.”

Mund të ketë qenë një përpjekje për të shtyrë Mottan të dorëhiqet, duke shpëtuar kështu para që Juventus do të duhet të paguajë për ta larguar trajnerin vetëm tetë muaj pas marrjes së detyrës.