Protestat në Turqi për arrestimin e Imamoglu, autoriteti kontrollues i medias turke pezullon transmetimin e kanalit pro-opozitar për 10 ditë

Një stacion televiziv opozitar në Turqi është pezulluar nga transmetimi për 10 ditë për “nxitje të urrejtjes dhe armiqësisë publike”, sipas autoritetit kontrollues  të mediave turke, RTÜK, mes protestave masive antiqeveritare në vend.

“Sözcü TV, i cili u gjobit kohët e fundit, “është dënuar me një pezullim 10-ditor”, tha autoriteti, duke kërcënuar se do t’i heqë licencën stacionit “nëse shkeljet vazhdojnë”.

RTÜK gjithashtu gjobiti dhe pezulloi disa programe në tre stacione të tjera televizive kritike ndaj qeverisë, duke përfshirë Halk TV, pesë nga gazetarët e të cilit u arrestuan në fund të janarit me akuzat për përpjekje për të ndikuar në gjyqësor. Gazetarët më në fund u liruan.

“Sanksionet më të rënda në historinë e medias turke u miratuan në mbledhjen e sotme të Këshillit të Lartë të RTÜK-së”, tha Ilhan Takçi, një anëtar i RTÜK-së i emëruar nga opozita, në një postim në X duke dënuar ashpër veprimin.

Autoritetet turke kanë arrestuar gjithashtu 11 gazetarë, duke përfshirë një fotograf të AFP-së, që nga fillimi i protestave masive antiqeveritare, të shkaktuara nga arrestimi dhe paraburgimi i kryetarit të bashkisë së Stambollit, Ekrem Imamoğlu.

Gjashtë nga gazetarët e arrestuar u liruan të hënën, ndërsa fotografi i AFP do të lirohej më vonë sot. Dy të tjerë u liruan pasi u mbajtën në paraburgim policor në Stamboll dhe Izmir, qyteti i tretë më i madh i vendit, ku dy gazetarë mbeten në paraburgim, sipas shoqatës turke të të drejtave të njeriut MLSA.

BBC raportoi më herët sot se një gazetar ishte dëbuar nga Turqia pasi autoritetet atje e akuzuan atë për “kërcënim tw rendit publik” në vend.

Disa gazetarë janë arrestuar në Turqi ditët e fundit teksa mbulonin protestat që janë ndaluar nga qeveria në disa qytete të mëdha.