Marrëveshja e paqes/ Putin del me propozimin e pazakontë: Ukraina të vendoset nën administrimin e përkohshëm të Kombeve të Bashkuara

Presidenti rus sugjeron që Ukraina të vendoset nën “administrimin e përkohshëm” të Kombeve të Bashkuara si pjesë e një marrëveshjeje paqeje dhe se Koreja e Veriut dhe BRICS duhet t’i bashkohen bisedimeve për armëpushimin e Ukrainës.

Duke folur me një grup ushtarakësh në portin verior rus të Murmansk, Presidenti rus Putin paraqiti disa dispozita për një proces paqeje për t’i dhënë fund luftës trevjeçare të nisur në shkurt 2022, sipas agjencisë shtetërore të lajmeve të Rusisë, TASS.

“Ndër sugjerimet e shumta të Putinit ishte një thirrje për zgjedhje të reja në Ukrainë dhe nënshkrimi i marrëveshjeve kyçe pasi vendi të jetë nën administrimin ndërkombëtar”, tha TASS.

“Në parim, natyrisht, një administratë e përkohshme mund të futet në Ukrainë nën kujdesin e OKB-së, Shteteve të Bashkuara, vendeve evropiane dhe partnerëve tanë. Kjo do të ishte për të mbajtur zgjedhje demokratike dhe për të sjellë në pushtet një qeveri të aftë që gëzon besimin e njerëzve dhe më pas për të filluar bisedimet me ta për një traktat paqeje”, citohet të ketë thënë Putin.
Putin tha gjithashtu se vendet e tjera duhet të përfshihen në procesin e paqes përtej SHBA-së dhe Rusisë, duke përfshirë aleatin e Moskës, Phenianin.

“Nuk janë vetëm Shtetet e Bashkuara, por edhe Republika Popullore e Kinës, India, Brazili, Afrika e Jugut, të gjitha vendet e BRICS. Dhe shumë të tjerë, për shembull, duke përfshirë Republikën Popullore Demokratike të Koresë”, tha Putin, ndërsa shtoi se ishte i gatshëm të punonte edhe me Evropën, megjithëse ajo po vepronte në mënyrë jokonsistente, duke u përpjekur vazhdimisht të mashtronte Moskën.

“Por është në rregull, ne jemi mësuar tashmë me të. Shpresoj se nuk do të bëjmë gabime bazuar në besimin e tepruar ndaj të ashtuquajturve partnerë tanë,” tha ai, sipas TASS.

Putin vlerësoi presidentin e SHBA Donald Trump, duke u shprehur se ai dëshironte vërtetë fundin e këtij konflikti.
Komentet e Putinit vijnë pas negociatave të veçanta në Riadin e Arabisë Saudite këtë javë midis zyrtarëve rusë, ukrainas dhe amerikanë që synojnë të sigurojnë një armëpushim të përkohshëm.

Mediat ruse thanë se raundi i dytë i bisedimeve do të rifillojë në Riad në mes të prillit.