Në gjyq për financimin e partisë/ Francë, pritet vendimi për fatin e Le Pen për zgjedhjet e ardhshme presidenciale

Marine Le Pen e Francës përballet të hënën me një moment të rëndësishëm, pasi një gjykatës do të vendosë nëse ajo duhet të përjashtohet nga zgjedhjet e ardhshme presidenciale.

Udhëheqësja e djathtë, e cila është përpara të gjithë rivalëve të saj në garën për zgjedhjet e vitit 2027, do të paraqitet në gjykatë paraditën e së hënës për vendimin lidhur me mënyrën e financimit të partisë së saj Rassemblement National (Tubimi Kombëtar), raporton BBC.

Në përfundim të gjyqit në nëntor, prokurori i shtetit ka kërkuar vendime fajësie për Le Pen dhe 24 të tjerë të akuzuar për përdorimin e parave të parlamentit evropian për të paguar pagat e partisë.

Por, prokurori ka thënë gjithashtu se dënimi i Le Pen nuk duhet të jetë vetëm një gjobë prej 300,000 euro dhe burgim, por edhe pamundësi për të kandiduar për poste publike për pesë vjet.

Më e rëndësishmja, ai prokurori ka kërkuar që papranueshmëria duhet të fillojë menjëherë, dhe jo të pezullohet në pritje të apelit që Marine Le Pen mund të paraqesë nëse dënohet.

Nëse gjyqtarët në rastin ndaj saj ndjekin rekomandimet e prokurorit, kjo do të nënkuptojë se Le Pen, e cila është 56 vjeçe, do t’i ndalohet të kandidojë në zgjedhjet presidenciale në të cilat ajo konsiderohet si fituese e mundshme.

“Është vdekja ime politike që ata kërkojnë”, kishte thënë Le Pen në nëntor.

Shumë komentues francezë, dhe jo vetëm ata që mbështesin Le Pen, kanë paralajmëruar për pasoja të rënda për demokracinë nëse gjyqësori shihet si ndërhyrës në zgjedhjen e liderit të vendit.