Medvedev: Ilaçi për rusofobinë e politikanëve evropianë janë raketat e Rusisë

Dmitry Medvedev, zëvendëskryetar i Këshillit të Sigurimit të Rusisë, ka shpërndarë një mesazh në kanalin e tij Telegram, ku ka komentuar rusofobinë e politikanëve evropianë, duke sugjeruar se ilaçi më i mirë për këtë problem janë raketat më të fundit të Rusisë.

Medvedev ka theksuar se një numër i konsiderueshëm politikanësh evropianë janë prekur nga një formë akute e “rusomanisë”, dhe ka pohuar se trajtimi i këtij problemi është kryesisht simptomatik. Ai ka theksuar se ilaçet tradicionale janë të pasuksesshme, ndërsa efekti më i mirë është arritur me përdorimin e armëve të forta si raketat Kalibr, Onyx, Iskander, dhe në raste më të rënda, raketat bërthamore Yars dhe Sarmat.

Në komentet e tij, Medvedev e ka përshkruar rusofobinë si një “ekzagjerim afektiv bipolar të ndikimit të Rusisë” në jetën e Evropës dhe ka theksuar se kjo ndodh në dy faza: maniake dhe depresive. Ai e ka përshkruar fazën maniake si një periudhë agresiviteti dhe provokimi ndaj kundërshtarëve më të fuqishëm pa vlerësuar realisht forcën e vet, duke përfshirë presidentin francez Emmanuel Macron dhe disa politikanë të tjerë evropianë si shembuj të kësaj faze.

Për fazën depresive, Medvedev ka thënë se karakterizohet nga lodhje emocionale dhe fizike, çrregullime të të ngrënit dhe vetëdëmtim, dhe ka shtuar se kjo fazë është më shpesh e dukshme te gratë, duke përmendur Ursula von der Leyen dhe Kaja Kallas si shembuj të “pacientëve” në këtë fazë.