BE akuzon Russia Today Balkans nga Serbia për dezinformata në Ballkan

Bashkimi Evropian, në raportin e tij të tretë mbi Manipulimin e Informacionit të Huaj dhe Kërcënimet e Ndërhyrjes, ka paralajmëruar për intensifikimin e operacioneve të ndikimit nga Rusia, duke përfshirë nisjen e "Russia Today Balkans" nga Serbia gjatë vitit 2024.

Sipas Shërbimit Evropian për Veprim të Jashtëm (EEAS), ‘Russia Today’ dhe ‘Sputnik’ janë platforma që janë pjesë e një ekosistemi të kontrolluar nga shteti rus, të cilat, nën maskën e gazetarisë legjitime përhapin propagandë dhe dezinformata në shkallë globale.

Raporti evidenton se Rusia mbetet aktori më aktiv dhe sistematik në përdorimin e manipulimit të informacionit si instrument strategjik për të penguar demokracitë perëndimore dhe për të destabilizuar BE-në.

Aktivitetet e saj përfshijnë operacione të koordinuara te dezinformimit të mbështetura nga shteti rus dhe shërbimet e inteligjencës ruse, duke përdorur një rrjet të gjerë kanalesh të kontrolluara – si Sputnik dhe Russia Today, si dhe faqe lokale të lidhura me interesa pro-Kremlinit.

"Russia Today, e themeluar në vitin 2005, përfaqëson një mjet kyç të Kremlinit për realizimin e operacioneve të gjera të ndikimit. Zgjerimi më i fundit përmes ‘Russia Today Balkans’, qe operon nga Serbia tregon qartë synimin për të destabilizuar më tej rajonin e Ballkanit Perëndimor, duke përfshirë edhe shtrembërimin e narrativit rreth procesit të zgjerimit të BE-së", thuhet në raport.

BE paralajmëron se po investohen burime të konsiderueshme për të penguar politikat evropiane në rajon, duke tentuar të dobësohet besimi i qytetarëve në integrimin evropian, si dhe të dëmtohen kapacitetet demokratike të institucioneve vendore..