Ceferin: Një shembull i jashtëzakonshëm per fuqinë e futbollit

Presidenti i UEFA Aleksandër Ceferin ka thënë sot në Kongresin e 49-të të UEFA që po mbahet në Beograd se bashkëpunimi i Shqipërisë dhe Serbisë në organizimin e Euro 2027 për Kampionatin e 21 vjeçarëve është një shembull i jashtëzakonshëm per fuqinë e futbollit.

“Ne e shohim një kampionat si Euro U21, që do të mirëpritet bashkërisht nga Shqipëria dhe Serbia si një shembull të shkëlqyer: kjo na kujton se nuk ka kufij të vërtetë në futbollin europian”, tha ai gjatë fjalimit që po mban në hapje të punimeve të këtij kongresi.

Kujtojmë se flamuri i Kosovës është duke u valëvitur përpara ndërtesës ku po zhvillohen punimet e këtij kongresi. Që nga dita e djeshme aty janë vendosur 55 flamujt e vendeve anëtare, mes të cilëve dhe flamuri i Kosovës.

Ndërkaq vetë presidenti i Federatës së Kosovës Agim Ademi, duke parakaluar në vendin ku do mbahet kongresi, ka bërë edhe një foto duke ngritur flamurin e Kosovës.

Kjo është e para herë në historinë e “luftës” disa vjeçare mes dy vendeve që Serbia ngre flamurin e Kosovës, dhe këtë e ka bërë nëpërmjet futbollit.