Harry Kane reagon për të ardhmen

Sulmuesi anglez Harry Kane nuk ka ndërmend t’i thotë lamtumirë Bavarisë.

Një vit e gjysmë pas mbërritjes në Gjermani, “uragani” nuk ka absolutisht asnjë dëshirë për t’u rikthyer në Premier League. Kohët e fundit janë shtuar zërat për një rikthim në vendlindje.

“Kanë dalë histori që nuk kanë asnjë bazë të vërtetë”, tha sulmuesi anglez Harry Kane për mediat.

Më pas ai shtoi: “Jam 100% i fokusuar te Bayern dhe te sezoni që jemi duke zhvilluar. Nuk e di se nga vijnë këto fjalë për transferimin tim tek ekipet e Premier League”.

Kane ka shënuar 77 gola në 83 ndeshje zyrtare me Bayern Munich, klub me të cilin ka një kontratë deri në verën e vitit 2027.

“Jam jashtëzakonisht i lumtur këtu. Mendoj se kemi një ekip fantastik, staf fantastik stërvitor dhe thjesht ndjej se dua të luaj në nivelin më të lartë të mundshëm“, shtoi Kane.

Në fund ai tha: “Unë e di se gjërat mund të ndryshojnë në futboll në një kohë të shkurtër, por në fund të fundit fokusi im është këtu“.