Moggi rikthehet të flasë për “Calciopoli”

Luciano Moggi është rikthyer të flasë për çështjen “Calciopoli”, duke shpjeguar versionin e tij të ngjarjeve. Ai e ka nisur duke komentuar vendimin gjyqësor, duke thënë se prokurori Narducci dhe koloneli i karabinierëve, Auricchio, “kanë zgjedhur një fajtor dhe më pas kanë kërkuar krime që nuk i kanë gjetur”.

Sipas Moggi, është e pamundur të provohet një krim i paeksistueshëm, pa asnjë provë konkrete.

Ai ka përmendur një ngjarje kur e kanë akuzuar për “sekuestrim personi” për një shaka që ka bërë ndaj arbitrit Cristiano Copelli, i cili ishte i njohur për lidhjet e tij me Milanin. Moggi shprehet se ndoshta do të kishte qenë më mirë ta kishte mbyllur vërtet Copelli në dhomën e zhveshjes.

Moggi, gjithashtu ka komentuar zhvillimet e fundit, duke përmendur një vendim të Gjykatës Civile të Kasacionit (7 mars 2025), që ka refuzuar kërkesat për dëmshpërblime nga ata që pretendonin se kishin pësuar dëme nga “Calciopoli”.

Ai ka pyetur pse u hoqën titujt e fituar me meritë nga Juventusi dhe iu dhanë skuadrave të tjera që nuk kishin të drejtë, duke përmendur edhe padrejtësinë ndaj individëve të pafajshëm dhe që po punonin për të përmirësuar futbollin italian.