Hansi Flick tremb Realin, s’ka humbur kurrë një finale

Barcelona triumfoi 1-0 mbrëmjen e djeshme ndaj Atletico Madrid, duke siguruar një vend për në finalen e Kupës së Mbretit, atje ku e pret Real Madridi. Për trajnerin Flick kjo do të jetë finalja e dytë me katalanasit, pasi të parën e fitoi.

Gjermani fitoi trofeun e tij të parë në krye të Barcelonës pasi katalanasit fituan 5-2 në finalen e Superkupës së Spanjës kundër Real Madridit. Strategu i njohur është një specialist i vërtet për finalet, pasi i ka fituar të gjitha, 6 nga 6.

Flick mori drejtimin e Bayernit në vitin 2019 dhe e udhëhoqi skuadrën drejt një suksesi historik në sezonin 2019/20. Ai mori Bayernin si të katërtin në renditjen e Bundesligës dhe nuk humbi asnjë ndeshje në sezonin 2019/20.

Flick më pas fitoi Kupën e Gjermanisë dhe Ligën e Kampionëve. Më pas shtoi koleksionin e trofeve dhe fitoi Superkupën e Evropës, Superkupën e Gjermanisë dhe Kupën e Botës për Klube. Tashmë misioni i radhës do të jetë finalja e Kupës së Mbretit ndaj Real Madridit, atje ku Flick synon të vijojë rekordin personal.