Armenia nis procesin e anëtarësimit në BE, reagon Rusia

Presidenti Vahan Khachaturian nënshkroi sot një ligj që fillon zyrtarisht procesin e pranimit të Armenisë në Bashkimin Evropian, njoftoi zyra presidenciale, raporton Kiev Independent.

Ky dokument nuk nënkupton hyrje të menjëhershme në BE, por pasqyron “aspiratat e qytetarëve”. Integrimi evropian është tashmë pjesë e legjislacionit armen.

Parlamenti armen miratoi ligjin "Për fillimin e procesit të anëtarësimit të Republikës së Armenisë në BE" në leximin përfundimtar të tij më 26 mars.

Nisma e nisur si peticion qytetar me 60 mijë nënshkrime të mbledhura mori mbështetjen e 64 deputetëve, ndërsa shtatë prej tyre votuan kundër. Kryeministri Nikol Pashinyan theksoi se procesi mund të përparojë vetëm nëse populli armen e miraton në referendum.

Moska zyrtare paralajmëroi më parë Armeninë se nuk mund të jetë njëkohësisht anëtare e BE-së dhe e Bashkimit Ekonomik Euroaziatik (EAEU), i udhëhequr nga Rusia.

“Të jesh anëtar i dy organizatave të ndryshme, hipotetikisht, është thjesht e pamundur”, tha zëdhënësi i Kremlinit, Dmitry Peskov.

EAEU, e themeluar në vitin 2015, përfshin Rusinë, Bjellorusinë, Kazakistanin, Armeninë dhe Kirgistanin dhe shihet si një mjet për Moskën për të ruajtur ndikimin mbi shtetet ish-sovjetike.

Përçarja midis Armenisë dhe Rusisë u përshpejtua pasi Kremlini nuk arriti të parandalonte ofensivën e Azerbajxhanit në Nagorno-Karabakh në shtator 2023, gjë që çoi në një eksod masiv të popullsisë armene nga rajoni.

Kryeministri Pashinyan ka deklaruar më parë se Armenia po përpiqet për lidhje më të ngushta me BE-në, por se anëtarësimi i plotë mbetet i pasigurt.

Në mars 2023, Parlamenti Evropian i bëri thirrje BE-së që të thellojë marrëdhëniet me Armeninë, duke vënë në dukje se vendi përmbush kërkesat e Traktatit të Mastrihtit për të aplikuar për anëtarësim.