Rusët sulmojnë vendlindjen e Zelenskyt, në mesin e viktimave ka fëmijë

Të paktën 14 persona, duke përfshirë gjashtë fëmijë, janë vrarë si pasojë e një sulmi rus sot në Krivi Rih të Ukrainës.

Presidenti Volodymyr Zelensky shkroi në rrjetin X, pasi Rusia goditi qytetin e tij të lindjes me raketë balistike.

"Një raketë ruse goditi një qytet të zakonshëm, duke prekur drejtpërdrejt një rrugë në një zonë banimi. Raportet paraprake sugjerojnë se ishte një sulm me raketa balistike. Aktualisht janë 14 vdekje të konfirmuara, duke përfshirë gjashtë fëmijë. Ngushëllimet e mia për familjet dhe të dashurit e tyre. Operacioni i shpëtimit është duke u zhvilluar dhe të paktën pesë ndërtesa banimi janë dëmtuar”, ka shkuar Zelensky.

Ai akuzoi Rusinë se nuk dëshiron armëpushim dhe se sulmet ruse po ndodhin çdo ditë.

“Rusia nuk dëshiron një armëpushim, dhe ne e shohim këtë. E gjithë bota e sheh atë. Çdo raketë dhe çdo sulm me dron dëshmon se Rusia kërkon vetëm luftë. Vetëm presioni botëror mbi Rusinë, të gjitha përpjekjet për të forcuar Ukrainën, mbrojtjen tonë ajrore dhe forcat tona mund të përcaktojnë se kur do të përfundojë lufta. Shtetet e Bashkuara, Evropa dhe pjesa tjetër e botës kanë kapacitetin për ta detyruar Rusinë të heqë dorë nga terrori dhe lufta. Kjo duhet të sigurohet – nevojitet paqja”, ka shtuar Zelensky.

Sipas kreut të administratës së mbrojtjes së qytetit, Oleksandr Vilkul, raketa balistike goditi një zonë të banuar. Një tjetër zyrtar lokal tha se blloqet e apartamenteve u dëmtuan dhe shpërthyen zjarre.

Ky është një nga sulmet më vdekjeprurëse në Krivi Rih që nga fillimi i luftës në shkurt 2022, dhe qyteti ishte gjithashtu në shënjestër në fillim të kësaj jave kur një ndërtesë në qendër u godit, duke vrarë katër persona.