Uzuni hap zemrën

Myrto Uzuni ka fituar shumë shpejt zemrat e tifozëve të Ostinit… mbase edhe pse flet mjaft mirë gjuhën e golit. Sulmuesi që i kushtoi ekipit teksan plot 12 milionë dollarë amerikanë ishte protagonist i një reportazhi të të përditshmes “Austin Chronicle”, e cila e krahason me yje si Zlatan Ibrahimoviç.

Në bashkëbisedimin me gazetarët e medies në fjalë, sulmuesi nga Berati tregoi edhe një herë hapat e parë në jetë.

“Kam nisur të luaj që kur isha i vogël dhe sigurisht që jam rritur duke u stërvitur. Kjo ishte e vetmja rrugë që kisha në dispozicion për t’ia dalë. Nuk isha një djalë i një familjeje të pasur, më është dashur të punoj fort për të arritur deri këtu. Ishim një familje normale.

I kam dedikuar kohën time futbollit, prandaj jam këtu sot. Nuk kisha fat, por kam punuar shumë”, thekson sulmuesi i talentuar.

Mes të tjerash ai tregon edhe momentet që sollën golin e parë për llogari të Ostin FC. “Goli i parë me skuadrën e re erdhi vetëvetiu. Unë i shikoj gjërat më mirë sepse e lexoj shumë mirë lojën. Në moment që Buka po futej në zonë, i thërrita të mos ulte kokën dhe të ma pasonte mua topin. Ai bëri siç i thash dhe shënova”, shpejgon Uzuni.

29-vjeçari, kur i tregojnë për afeksionin që ka për Kristiano Ronaldon, thotë se punon fort në stërvitje për të bërë diferencën në ndeshje pasi vetëm kështu shokët e ekipit do ta shikojnë si shembullin për tu ndjekur. “Nuk mendoj se jam egoist apo të sjell këtë mentalitet në ekip. Unë dua që shokët të më shikojnë si shembull.

Prandaj punoj fort, por kjo nuk do të thotë se nuk gaboj. Unë duhet të punoj shumë kështu të përmirësohem”, thotë Uzuni në prag të ndeshjes së radhës të Ostin FC, e cila luan në orët e para (01:45) të ditës së diel zbret në fushë përballë Portland Timbers.