Parlamenti miraton amendamentin kushtetues që kufizon liritë e të drejtat e njeriut. Deputetët e opozitës organizojnë protesta

Parlamenti hungarez ka miratuar një amendament të Kushtetutës që kufizon ndjeshëm liritë civile dhe të drejtat e njeriut. Sipas mediave lokale, amendamenti mbulon një spektër të gjerë çështjesh.   Votimit i parapriu protesta e deputetëve të opozitës dhe disidentëve të cilët tentuan të pengonin hyrjen e deputetëve të mazhorancës në Parlament.  Protestat po zhvillohen në disa zona të kryeqytetit hungarez, Budapestit.

Në qendër të reformës është përparësia e të drejtave të fëmijëve për “zhvillimin e duhur fizik, intelektual dhe moral” ndaj të drejtave të tjera themelore, përveç të drejtës për jetë, duke përfshirë lirinë e tubimit paqësor, një dredhi e përdorur për të ndaluar marshimet e Krenarisë.

Amendamenti gjithashtu lejon përdorimin e njohjes së fytyrës për të gjurmuar dhe gjobitur pjesëmarrësit.

Qeveria e sheh këtë ndryshim si “një mbrojtje kushtetuese kundër ndikimeve ideologjike që kërcënojnë mirëqenien e fëmijëve, veçanërisht në kontekstin e ngjarjeve të tilla si paradat e Krenarisë”, tha zëdhënësi Zoltan Kovacs në një postim në Twitter.

Ndryshimet në ligjin bazë kanë të bëjnë edhe me përcaktimin e gjinisë. “Seksi i një personi në lindje është një karakteristikë biologjike dhe mund të jetë mashkull apo femër”, thuhet në tekstin e miratuar.

Prandaj, me këtë amendament të ri, njohja ligjore për personat trans dhe interseks është eliminuar. Një aspekt tjetër ka të bëjë me mbrojtjen e sovranitetit përballë ndërhyrjeve të huaja të supozuara.

Amendamenti parashikon mundësinë e pezullimit të shtetësisë së shtetasve hungarezë me shtetësi të dyfishtë, nëse kjo paraqet një kërcënim për sigurinë kombëtare. Përcaktohet një periudhë maksimale prej dhjetë vjetësh, me mundësi dëbimi për ata që banojnë në Hungari.

Ndryshimet në Kushtetutë kanë të bëjnë gjithashtu me të ashtuquajturat kompetenca emergjente, të cilat u aktivizuan së fundmi me shpërthimin e luftës në Ukrainë.

Sipas rregulloreve aktuale, qeveria mund të shpallë gjendjen e jashtëzakonshme për tridhjetë ditë, e cila mund të zgjatet nga një shumicë prej dy të tretash të Asamblesë Kombëtare deri në 180 ditë dhe për një numër të pakufizuar herë.

Këto rregulla do të vazhdojnë të zbatohen, por në të ardhmen, qeveria nuk do të jetë më në gjendje të pezullojë ligjet me dekret ose të derogojë dispozitat e ligjit pa autorizimin e shumicës së dy të tretave të Parlamentit.

Amendamenti i miratuar vendos gjithashtu bazat kushtetuese për vetëmbrojtjen e bashkive, garanton të drejtën e pagesave në para, të përcaktuara nga ligjvënësit si mbrojtje kundër kontrollit dixhital dhe autorizon dënimet me burg për përdorimin ose mbajtjen e drogës, qoftë edhe në sasi të vogla.