Unitedi ia vendosë çmimin Antonyt

Manchester United ka vendosur një çmim të qartë për shitjen e Antony gjatë afatit kalimtar të verës.

Sipas gazetarit Jamie Jackson, klubi anglez kërkon të përfitojë të paktën 30 milionë paund nga transferimi i anësorit brazilian — një shumë që pasqyron si investimin fillestar, ashtu edhe përmirësimin e tij të fundit në fushë, sidomos pas huazimit te Real Betis, ku ka rifituar formën e tij më të mirë.

Në moshën 25-vjeçare, Antony ka gjetur skenën ideale te skuadra andaluziane për të treguar vlerat e tij. Që nga ardhja në Sevilje, ai ka zhvilluar 17 ndeshje, ka shënuar 5 gola dhe ka dhënë 4 asistime, duke rikthyer nivelin që mungonte te Manchester United. Ky ndikim i menjëhershëm ka rritur vlerën e tij në treg, pikërisht në kohën kur “Djajtë e Kuq” kërkojnë të ristrukturojnë skuadrën dhe të gjenerojnë fonde për përforcime të reja.

Megjithatë, vlerësimi i lartë nga United vështirëson mundësinë që Betis ta mbajë përtej këtij sezoni, pasi klubi spanjoll nuk ka fuqinë financiare për të përmbushur kërkesën. Kjo situatë mund të hapë rrugën për klube të tjera, të cilat mund të përfitojnë nga forma aktuale e Antony për ta transferuar.

Në “Old Trafford”, trajneri Ruben Amorim nuk e sheh brazilianin si pjesë të projektit të tij, dhe gjithçka tregon se ai do të largohet përfundimisht pas përfundimit të sezonit. Me disa klube që e ndjekin nga afër, Antony mund të bëhet një nga emrat më të përfolur të merkatos së verës, ndërsa United synon të rikuperojë një pjesë të investimit që nuk dha rezultat në Premier League.