Igli Tare, favorit ndaj rivalëve

Teksa sezoni futbollistik po shkon drejt fundit, te Milani vëmendja ka kaluar natyrshëm te planet për të ardhmen.

Pas një sezoni që nuk përmbushi pritshmëritë, klubi kuqezi është në kërkim të një drejtori të ri sportiv – një figurë kyçe për ndërtimin e skuadrës së sezonit të ardhshëm dhe për rritjen e konkurrueshmërisë së projektit sportiv.

Emri që kryeson listën e kandidatëve është ai i Igli Tares, ish-drejtor sportiv i Lazios.

Sot është parashikuar një takim i dytë mes Tares dhe CEO-së së Milanit, Giorgio Furlani, i cili pritet të zhvillohet në Romë, ashtu si takimi i mëparshëm i mbajtur më 15 prill.

Sipas ‘La Gazzetta dello Sport’, ky është kontakti i tretë mes palëve, pas atij të parë në Londër pothuajse dy muaj më parë, kur Tare u takua me Gerry Cardinale-n dhe Zlatan Ibrahimović-in.

Që nga ajo kohë, komunikimi mes Tares dhe drejtuesve të Milanit ka qenë i vazhdueshëm, edhe në mënyrë telefonike – një shenjë që klubi e vlerëson seriozisht profilin e tij.

Në krahasim me emrat e tjerë si Tony D’Amico (Atalanta), Giovanni Manna (Napoli) dhe Giovanni Sartori (Bologna), Tare ka një avantazh të qartë: është i lirë nga çdo detyrim kontraktual dhe mund të angazhohet menjëherë pa nevojën e negociatave të ndërlikuara me klube të tjera.

Profili i duhur për projektin “RedBird”

Tare ka ndërtuar një reputacion të fortë gjatë viteve te Lazio si një zbulues i talenteve dhe ndërtues i skuadrave konkurruese me buxhete të kufizuara – një përvojë që përputhet mirë me filozofinë e re të Milanit nën drejtimin e grupit RedBird: të kombinojë qëndrueshmëri financiare me ambicie sportive.

Megjithatë, takimi i sotëm nuk pritet të jetë vendimtar.

Furlani vazhdon të eksplorojë tregun për të gjetur figurën më të përshtatshme që do të marrë në dorë projektin teknik të Milanit.

Ajo që është e qartë është se emri i Igli Tares mbetet më i nxehti në listë.

Takimi i sotëm do të ndihmojë për të kuptuar më mirë synimet e të dyja palëve dhe mund të jetë një hap vendimtar drejt një marrëveshjeje të mundshme.