Costa vë në pikëpyetje Vuçiqin për pjesëmarrjen në paradën ruse të Ditës së Fitores

Sipas The Guardian, duke folur për gazetarët në Beograd më herët gjatë ditës së sotme, Presidenti i Këshillit të Evropës, Antonio Costa, tha se kishte kërkuar sqarime për domethënien e vizitës së Vuçiqit në Moskë javën e kaluar.

“Sipas asaj që më shpjegoi ai [Vuçiq], ishte një moment për të festuar një ngjarje nga e kaluara, por në të tashmen Serbia është plotësisht e përkushtuar ndaj procesit të anëtarësimit në Bashkimin Evropian dhe Serbia e di se për këtë është e nevojshme të ketë përputhje të plotë me politikën tonë të përbashkët të jashtme dhe të sigurisë”, u shpreh Costa, shkruan The Guardian,

Ndërkohë, një zëdhënëse e përfaqësueses së lartë të BE-së, Kaja Kallas, dha një mesazh më të drejtpërdrejtë kur u pyet për këtë udhëtim të hënën: “Gjykohesh nga shoqëria që mban”.

Vizita ndodhi në një kohë kur Vuçiq përballet me protesta të paprecedenta, ndërsa procesi i anëtarësimit të Serbisë në BE është në ngërç. Costa tha se është e rëndësishme të sigurohen “angazhime konkrete” për lirinë e medias, ligjin zgjedhor dhe ligjet kundër korrupsionit, të cilat do të jenë thelbësore për të çuar përpara hapat e mëtejshëm në negociatat e anëtarësimit.

Vuçiq, vendi i të cilit aspiron të anëtarësohet në Bashkimin Evropian, ishte ndër udhëheqësit ndërkombëtarë, përfshirë kryeministrin sllovak Robert Fico, që udhëtuan në Moskë për të marrë pjesë në paradën vjetore të Ditës së Fitores, që përkujton fundin e Luftës së Dytë Botërore, duke injoruar paralajmërimet për të mos u pozicionuar përkrah presidentit rus Vladimir Putin, i cili po zhvillon një luftë të përgjakshme kundër Ukrainës.