Francezi po rri pezull te Juventusi

Randal Kolo Muani nuk po kalon një sezon të bujshëm në aspektin statistikor, por sulmuesi francez duket se ka gjetur qetësinë dhe hapësirat që kërkonte te Juventusi.

I ardhur në formë huazimi nga PSG-ja gjatë merkatos së janarit, Kolo Muani po përfiton nga minutat e ofruara në Serinë A për të rikuperuar besimin dhe për të treguar vlerat e tij.

Pas ndeshjes kundër Lacios, e përfunduar me rezultatin 1-1, 25-vjeçari francez ka folur për mediat me një ton optimist, duke theksuar rëndësinë që ka për të rikthimi në fushë me vazhdimësi dhe ndjesinë pozitive që i ka ofruar ambienti bardhezi.

“Jam shumë i lumtur për mikpritjen që kam marrë këtu në Torino. Kjo skuadër është si një familje për mua”, tha ai pas sfidës në “Olimpico”. Edhe pse transferimi i tij është vetëm i përkohshëm, deklaratat e Kolo Muanisë kanë lënë të kuptohet se lojtari është i hapur për një qëndrim të mundshëm edhe pas këtij sezoni.

Komentet e tij pozitive për klubin, stafin dhe shokët e skuadrës u kanë dhënë tifozëve bardhezi një fije shprese për ta parë sulmuesin francez të vazhdojë aventurën e tij në Torino. Me dy ndeshje vendimtare përpara, çdo paraqitje e tij do të peshojë jo vetëm për renditjen e Juventusit, por edhe për të ardhmen e vetë lojtarit në Torino.