Detaje nga negociatat, kështu provokuan rusët në Stamboll

Kreu i delegacionit rus Vladimir Medinsky ka provokuar palën ukrainase gjatë bisedimeve sot në Stamboll, duke dëshmuar kështu se sa larg është Rusia nga një vullnet real për paqe.

Oliver Carroll, një gazetar i Economist, duke cituar një burim të mirinformuar që kishte njohuri për bisedimet, përcolli fjalët e Medinsky në platformën X.

"Ne nuk duam luftë, por jemi gati të luftojmë për një vit, dy, tri - aq sa duhet. Ne kemi qenë në luftë me Suedinë për 21 vjet. Sa kohë jeni gati të luftoni?", u është drejtuar Medinsky palës ukrainase në tavolinën e bisedimeve.

Medinsky është një këshilltar i Kremlinit dhe ideolog i gjatë i regjimit rus, i cili më parë udhëhoqi bisedimet e dështuara me Ukrainën, në vitin 2022.

Burimet ukrainase kanë paralajmëruar se Rusia po vjen në negociata në Stamboll pa një vullnet të vërtetë për kompromis, me kërkesa jorealiste ndaj Kievit si ajo për tërheqjen e trupave nga rajonet Donetsk, Luhansk, Zaporizhia dhe Kherson, si dhe njohjen e aneksimit ilegal të Krimesë në vitin 2014.