Starmer: Marrëveshja Britani-BE na largon nga mosmarrëveshjet për Brexit-in

Kryeministri britanik Sir Keir Starmer ka thënë se është koha për të lënë mënjanë "luftërat politike" rreth Brexit-it, pasi Mbretëria e Bashkuar dhe Bashkimi Evropian ranë dakord për një rivendosje të madhe të marrëdhënieve.

Mbretëria e Bashkuar dhe BE-ja kanë arritur një marrëveshje që mbulon peshkimin, tregtinë, mbrojtjen, energjinë dhe forcimin e lidhjeve në një numër fushash politike që janë ende në negociata, shkruan BBC, transemeton KosovaPress.

Një pjesë kyçe e marrëveshjes përfshin dhënien e anijeve evropiane të peshkimit për 12 vjet të tjera akses në ujërat britanike në këmbim të lehtësimit të disa mosmarrëveshjeve tregtare.

Kjo shënon ringritjen më të madhe që kur Mbretëria e Bashkuar u largua zyrtarisht nga BE në vitin 2020 dhe vjen pas vitesh mosmarrëveshjesh mbi Brexit-in.

Konservatorët dhe Reform UK e kanë përshkruar marrëveshjen si një "dorëzim" ndaj BE-së, ndërsa Demokratët Liberalë thanë se qeveria kishte ndërmarrë disa "hapa të parë pozitivë" për të rindërtuar lidhjet me Evropën.

Marrëveshja u finalizua vonë të dielën, përpara një samiti që përfshinte shefat e BE-së Ursula von der Leyen dhe Antonio Costa në Londër të hënën.

"Është koha të shohim përpara", tha Sir Keir në samit.

"Të largohemi nga debatet e vjetra dhe grindjet politike për të gjetur logjikë të shëndoshë dhe zgjidhje praktike që u japin më të mirën popullit britanik.

"Jemi të gatshëm të punojmë me partnerë nëse kjo do të thotë që mund të përmirësojmë jetën e njerëzve këtu në vend."

Në një konferencë për shtyp, Presidentja e Komisionit Evropian von der Leyen e përshkroi samitin si një "moment historik" që u bë i mundur vetëm "falë lidershipit" të Sir Keir.

"Po kthejmë një faqe," tha ajo. "Po hapim një kapitull të ri në marrëdhënien tonë."

Presidenti tha se marrëveshja do të bënte "një ndryshim të vërtetë për njerëzit në Mbretërinë e Bashkuar dhe në të gjithë bashkimin tonë" në një kohë paqëndrueshmërie globale.