Krimet e motivuara politikisht në Gjermani arrijnë një nivel rekord

Ministria e Brendshme e Gjermanisë ka propozuar një sërë masash të reja për të luftuar krimet me motive politike, të cilat kanë shënuar një rritje të ndjeshme gjatë vitit të kaluar.

Sipas autoriteteve, në vitin 2024 janë regjistruar mbi 84,000 raste të tilla – një rritje prej 40% krahasuar me një vit më parë dhe shifra më e lartë që nga viti 2001.

Ministri i Brendshëm, Alexander Dobrindt, deklaroi se ky fenomen është thelluar sidomos në sfondin e luftës Izrael-Hamas dhe zgjedhjeve të përgjithshme të mbajtura në shkurt.

Në një konferencë për shtyp të mbajtur të martën, Dobrindt nënvizoi se rritja është vërejtur në thuajse të gjitha fushat, por veçoi si kërcënime kryesore antisemitizmin dhe ekstremizmin e krahut të djathtë.

Sipas të dhënave të prezantuara prej tij, mbi gjysma e krimeve të motivuara politikisht lidhen me ideologji të ekstremit të djathtë, përfshirë edhe neonazizmin.

Një tjetër tregues shqetësues është rritja e krimeve antisemite, ku vetëm gjatë vitit të kaluar u regjistruan 6,236 raste të tilla – një rritje prej 21%. Rreth 2,832 nga këto raste kanë qenë të lidhura me temat “Izrael” dhe “Palestinë”, veçanërisht në kontekstin e tensioneve në Lindjen e Mesme.

Sipas ministrit, 793 nga krimet ishin të dhunshme dhe shpesh ndodhën në kuadër të protestave dhe demonstratave.

Përballë këtyre zhvillimeve, Dobrindt kërkoi që forcat e rendit të pajisen me më shumë kompetenca dhe propozoi masa konkrete, si dyfishimi i dënimit minimal për sulmet ndaj oficerëve të policisë – nga tre në gjashtë muaj.

Ai gjithashtu mbështeti ndryshime ligjore që do ta bëjnë më të ashpër dënimin për sulmet me thikë, duke e çuar minimumin e burgimit nga gjashtë muaj në një vit.

Politikanë dhe zyrtarë të tjerë kanë shprehur shqetësim për situatën. Komisionerja për antiracizëm, Natalie Pawlik, e cilësoi rritjen e krimeve raciste, antisemite dhe islamofobe si “dramatike”.

Sipas Dobrindt, krimet e motivuara politikisht po përhapin frikë dhe po pengojnë politikanët dhe vullnetarët në kryerjen e punës së tyre.

Ai theksoi se lufta kundër ekstremizmit të djathtë do të jetë përparësi kyçe e qeverisë në muajt në vijim.