Belgjika gati të dërgojë trupa në Ukrainë sapo të ketë armëpushim

Belgjika është gati të dërgojë trupa në Ukrainë sapo të ketë një armëpushim me Rusinë dhe t’i furnizojë vendit çdo vit armë me vlerë një miliard euro, tha Ministri i Mbrojtjes Theo Francken për gazetarët.

“Ekziston një grup pune i koalicionit të të gatshëmve dhe ata po punojnë nën udhëheqjen e britanikëve dhe francezëve. Ata po zhvillojnë një plan dhe po punojnë shumë ngushtë së bashku. Në momentin që ka një armëpushim, ne mund të veprojmë menjëherë me koalicionin e të gatshëmve në tokën ukrainase”, tha Francken pas mbërritjes së tij në takimin e ministrave të jashtëm dhe të mbrojtjes të BE-së në Bruksel.

Zyrtari më i lartë i mbrojtjes theksoi se forcat ruse duhet të tërhiqen nga territori ukrainas menjëherë pas armëpushimit.

“Ne do të vazhdojmë ta mbështesim Ukrainën. Sapo miratuam një paketë prej një miliard eurosh dhe do të vazhdojmë ta mbështesim Ukrainën edhe për vitet e ardhshme, duke ndarë një miliard euro ndihmë ushtarake çdo vit”, vuri në dukje ai, duke shtuar se Belgjika i përdor këto para për të porositur armë për Kievin nga ndërmarrjet e veta të mbrojtjes.

“Është e rëndësishme që një pjesë e konsiderueshme e këtyre parave të kthehet në Belgjikë dhe të krijojë vende pune në industritë tona të mbrojtjes. Ne kemi një industri të shkëlqyer mbrojtëse, prandaj do ta mbështesim atë, edhe nëse kërkon fonde të konsiderueshme. Kjo është arsyeja pse ky miliard është i garantuar; ne do të vazhdojmë të ofrojmë këtë nivel mbështetjeje”, theksoi Francken.

“Ne do të përpiqemi t’i dorëzojmë avionët F-16 edhe para datës që u caktua”, tha zyrtari i lartë i mbrojtjes, pa specifikuar se çfarë donte të thoshte. Situata me dorëzimin e avionëve të premtuar F-16 mbetet e paqartë. Vendi premtoi të dorëzonte dy të parët deri në fund të vitit 2024. Megjithatë, kjo datë është shtyrë vazhdimisht për shkak të vonesave në dorëzimin e avionëve F-35 të porositur nga SHBA-të në vitin 2018.

Belgjika ka vetëm rreth 40 avionë F-16, të vënë në shërbim në vitet 1970, dhe premton t’i transferojë ata në Kiev sapo të marrë avionët e rinj. Nuk është e qartë se sa nga avionët F-16 që Belgjika ka aktualisht janë funksionalë.