Policia vret një migrant në Serbi

Pjesëtarët e Ministrisë së Punëve të Brendshme të Serbisë, konkretisht nga Drejtoria e Policisë Kufitare, kanë zhvilluar një operacion me masa të shtuara sigurie për të kontrolluar lëvizjen e migrantëve në zonën ndërmjet qytetit të Shidit dhe kufirit shtetëror me Kroacinë.

Kjo zonë është shpesh e njohur si një rrugë e përdorur nga migrantët e paligjshëm për të kaluar në mënyrë ilegale drejt Bashkimit Evropian, ndaj edhe është nën mbikëqyrje të vazhdueshme nga autoritetet kufitare.

Gjatë këtij operacioni, forcat policore janë përballur me rezistencë të armatosur nga një kamp ilegal që ndodhej në pyll, në afërsi të kufirit. Nga ky kamp është hapur zjarr ndaj pjesëtarëve të policisë, të cilët kanë reaguar menjëherë dhe janë detyruar të përdorin armët e tyre në vetëmbrojtje. Si pasojë e përplasjes së armatosur, një nga sulmuesit është vrarë në vend, ndërsa katër persona të tjerë janë arrestuar dhe neutralizuar nga forcat e rendit

.Në kuadër të këtij operacioni, pas një kontrolli të imtësishëm të terrenit përreth, është zbuluar një kamp i improvizuar, në të cilin po qëndronin migrantë të parregullt. Sipas portalit informativ nova.rs, ky kamp ishte i ndërtuar në kushte të papërshtatshme dhe i fshehur në një zonë të pyllëzuar, me qëllim shmangien e autoriteteve.

Gjatë ndërmarrjes së masave dhe veprimeve ligjore për shpërbërjen e këtij kampi dhe ndalimin e personave të përfshirë, migrantët kanë qëlluar me armë zjarri ndaj policisë, duke rrezikuar seriozisht jetën e pjesëtarëve të forcave të sigurisë. Për shkak të shkëmbimit të zjarrit, një migrant ilegal humbi jetën. Katër të tjerë u ndaluan në vendin e ngjarjes, ndërsa disa të tjerë arritën të largohen në drejtim të panjohur dhe janë aktualisht në kërkim nga autoritetet.

Në njoftimin zyrtar të Ministrisë së Punëve të Brendshme të Serbisë theksohet se janë duke u ndërmarrë të gjitha veprimet hetimore për zbardhjen e plotë të ngjarjes. Në vendin e ngjarjes ndodhen hetuesit e Drejtorisë së Policisë së Sremska Mitrovicës, si dhe prokurori përgjegjës nga Prokuroria e Lartë Publike, i cili po drejton procesin e hetimeve për të përcaktuar në mënyrë të detajuar të gjitha rrethanat që çuan në këtë përplasje të armatosur.

Autoritetet serbe kanë theksuar se situata në kufi mbetet e tensionuar për shkak të fluksit të madh të migrantëve që përpiqen të kalojnë në mënyrë të paligjshme drejt vendeve të Bashkimit Evropian, dhe se operacione të tilla do të vazhdojnë për të garantuar rendin, sigurinë dhe mbrojtjen e kufijve shtetërorë.