Goditje politike për kryeministrin spanjoll, BE refuzon të shtojë gjuhën katalanase në listën zyrtare të Unionit

Kryeministri spanjoll, Pedro Sanchez pësoi një goditje të madhe politike në Këshillin e Çështjeve të Përgjithshme të BE-së, i cili refuzoi të mbështeste propozimin e tij për të shtuar gjuhën katalanase, baske dhe atë galike në listën e gjuhëve zyrtare të Unionit.

Kjo humbje mund të rrezikojë aftësinë e Sanchez për të miratuar buxhetin e ri dhe për të përmbushur kërkesat e NATO-s për rritjen e shpenzimeve të mbrojtjes.

Në këmbim të mbështetjes bazë që i nevojitet për të formuar një qeveri të re minoritare, Sanchez i premtoi partisë separatiste katallanë, Junts në vitin 2023 se do të shtonte gjuhën katalanase, baske dhe galike në listën e 24 gjuhëve zyrtare të BE-së.

Për këtë qëllim, Ministri i Jashtëm spanjoll José Manuel Álvarez ka kaluar pothuajse dy vjet duke u përpjekur të sigurojë mbështetjen unanime të nevojshme për të miratuar masën, e cila konsiderohet thelbësore për të siguruar stabilitetin politik në Madrid.

Megjithatë, vendet e BE-së fillimisht ishin të kujdesshme ndaj propozimit dhe në fund e hodhën poshtë kërkesën e Madridit. Masa nuk u hodh poshtë menjëherë, por, siç është zakon kur nuk ka mbështetje unanime në Këshillin e Çështjeve të Përgjithshme të BE-së, përfaqësuesit e shteteve anëtare zgjodhën ta shtyjnë votimin për propozimin për një kohë të pacaktuar.

Vendimi i Këshillit për të refuzuar kërkesën për njohje gjuhësore po krijon një dhimbje koke për Sanchez, qeveria e të cilit në pakicë ka nevojë për mbështetjen e partisë Junts për të miratuar legjislacionin.

Një zyrtar i partisë katalanase, i cili kërkoi të mbetej anonim për të diskutuar negociatat delikate, pranoi se Madridi kishte bërë përpjekje të vërteta për t’i bërë gjuhët zyrtare në nivelin e BE-së dhe tha se diplomatët spanjollë kishin bashkëpunuar me mirëbesim gjatë fushatës shumëvjeçare të presionit.

Megjithatë, zyrtari nuk pranoi të thoshte nëse Junts do ta mbante ende Sanchez përgjegjës për mospërmbushjen e një prej angazhimeve që ai bëri në marrëveshjen e mbështetjes të arritur në vitin 2023. Kryeministri ende nuk e ka miratuar buxhetin gjatë mandatit të tij aktual dhe do të ketë nevojë për mbështetjen e separatistëve katalanas për ta bërë këtë.

Spanja është vendi me shpenzimet më të ulëta në NATO, duke ndarë vetëm 1.28% të buxhetit të saj për qëllime ushtarake në vitin 2024 shumë më poshtë objektivit prej 2% të Aleancës dhe një pjesë e 5% të kërkuar nga Presidenti i SHBA-së Donald Trump.