Mafia italiane braktis luftërat e ashpra/ Raporti zbulon bashkëpunimin mes Cosa Nostra, Camorra-s dhe Ndrangheta-s

Mafia e Italisë po i largohet luftërave të dhunshme për territor dhe po bashkëpunon në trafikun e drogës, rrjetet e prostitucionit dhe pastrimin e parave, tha agjencia kombëtare antimafia (DIA) në një raport vjetor mbi grupet e krimit të organizuar të martën.

Cosa Nostra e Siçilisë dhe Camorra rreth Napolit po krijojnë aleanca brenda dhe jashtë vendit, ndërsa Ndrangheta, me qendër në Kalabri, në skajin jugor të Italisë, po përqendrohet gjithnjë e më shumë në kontrollin e projekteve të punëve publike, thuhet në raport.

“Bashkëjetesa ka nxitur sinergji që janë strukturuar progresivisht”, tha drejtori i DIA-s, Michele Carbone, në një konferencë për shtyp. Këto struktura ishin bërë “të afta për të absorbuar mbivendosjet, tensionet dhe fërkimet”, shtoi ai.

Punimet publike të lidhura me Fondin e Rimëkëmbjes pas COVID-it të Italisë të mbështetur nga BE-ja, planet për një urë të madhe që lidh Siçilinë me kontinentin dhe përgatitjet për Lojërat Olimpike Dimërore 2026 ishin të gjitha në rrezik të infiltrimit të mafias, tha raporti i DIA-s.

Sektori i ndërtimit përfaqësonte 38% të masave administrative antimafia në vitin 2024, me hetime në 200 kantiere ndërtimi për projekte publike. Carbone tha se DIA ishte gati të bllokonte çdo përfshirje të mafias në urën për në Siçili.

“Së shpejti do të fillojnë të gjitha aktivitetet parandaluese kundër mafias në lidhje me ndërtimin e urës mbi Ngushticën e Mesinës”, tha ai.

DIA theksoi gjithashtu ekspertizën teknologjike në rritje të mafies, duke përdorur kanale komunikimi të koduara dhe duke mbajtur kontakte me të burgosurit përmes dronëve.

Rrjetet kineze të “bankave nëntokësore” po përdoren gjithnjë e më shumë për pastrim parash, tha raporti.

Në të njëjtën kohë, rekrutimi i të rinjve të margjinalizuar për të kryer krime në ato që quhen “banda fëmijësh” lehtësohet nga shfaqjet spektakolare të pushtetit në mediat sociale, thuhet në raport.