Goditja e pestë ndaj opozitës në Turqi! Dhjetëra arrestime për korrupsion, mes tyre kryetarë bashkish dhe zyrtarë të lartë të CHP

Autoritetet turke kanë urdhëruar arrestimin e dhjetëra personave nën akuza për korrupsion, përfshirë zyrtarë të lartë të partisë opozitare CHP dhe kryetarë bashkish në qytetet e Stambollit dhe Adanas.

Ky zhvillim përfaqëson valën e pestë të një serie goditjesh të ashpra ndaj kundërshtarëve politikë të qeverisë.

Sipas Zyrës së Prokurorit Publik të Stambollit, janë lëshuar urdhra ndalimi për 47 persona, nga të cilët 30 janë ndaluar tashmë. Mes të ndaluarve ka figura të rëndësishme politike, përfshirë kryetarë bashkish lokale dhe zyrtarë të administratës së qytetit.

Operacionet e fundit vijnë pas arrestimit të bujshëm të kryetarit të Bashkisë së Stambollit, Ekrem Imamoglu, në mars të këtij viti, një figurë kyçe e opozitës dhe rival i fortë i presidentit Recep Tayyip Erdogan. Imamoglu, anëtar i Partisë Republikane Popullore (CHP), u burgos për akuza që përfshijnë korrupsion dhe ndihmë ndaj një grupi terrorist – akuza që ai i ka mohuar kategorikisht.

Nga burgu, Imamoglu dërgoi një letër të lexuar në një tubim të opozitës ku denoncoi arrestimet si politike. “Tani po i merrni kryetarët e bashkive tona me justifikime fiktive. Çfarë do të bëni? Ku do të ndaleni? Do t’i hidhni 16 milionë banorë të Stambollit në burg një nga një?”, shkruante ai.

Qeveria turke mohon çdo ndërhyrje politike, duke këmbëngulur se veprimet janë rezultat i një procesi të pavarur gjyqësor. Megjithatë, kritikët e brendshëm dhe ndërkombëtarë, përfshirë Zyrën e OKB-së për të Drejtat e Njeriut dhe Amnesty International, kanë shprehur shqetësim për shkallën dhe motivet e arrestimeve, duke i quajtur ato “veprime drakoniane”.

Në katër valët e mëparshme të arrestimeve janë ndaluar rreth 110 persona, ndërsa vetëm në protestat që pasuan arrestimin e Imamoglut u arrestuan 819 persona, të cilët do të përballen me hetime penale të ndara.

Në një reagim të fundit, anëtari i Asamblesë së CHP-së, Baki Aydöner, deklaroi se ishte informuar nga bashkëshortja për një kontroll policor në banesën e tyre dhe për një urdhër arresti ndaj tij, ndërsa ai ndodhej në Ankara për një takim të partisë.

Situata mbetet e tensionuar, me opozitën që e sheh këtë valë arrestimesh si një përpjekje për të shtypur zërat kritikë dhe për të konsoliduar pushtetin përpara zgjedhjeve të ardhshme.