Zgjedhja e Nawrockit e shtyn Poloninë drejt një përplasjeje me vizionin evropian

Fitorja e Karol Nawrockit në zgjedhjet presidenciale të Polonisë ka shënuar një kthesë të fortë në skenën politike të vendit, duke rritur ndikimin e krahut të djathtë dhe duke sfiduar qeverinë pro-evropiane të kryeministrit Donald Tusk.

Megjithëse presidenti në Poloni ka pushtet më të kufizuar krahasuar me homologët në vende të tjera, si Franca, zgjedhja e Nawrockit konsiderohet një dështim politik për Tuskun. Analistët thonë se humbja e kandidatit liberal Rafal Trzaskowski nuk është domosdoshmërisht fitore për Nawrockin, por një refuzim i qeverisë së Tuskut, me thirrje të hershme për dorëheqjen e tij – ndonëse një veprim i tillë mbetet i pamundur për momentin.

Pas këtij zhvillimi, priten ndryshime në strukturat e brendshme të qeverisë, me mundësi dorëheqjesh nga figura kyçe si Ministri i Drejtësisë. Ndërkohë, vetëm Radek Sikorski, ministri aktual i Jashtëm, mbetet si një figurë me ndikim nga krahu pro-evropian. Ai përflitet si një sfidues i mundshëm i lidershipit të Tuskut brenda Platformës Qytetare, pavarësisht mungesës së një baze të fortë partiake.

Nawrocki, i cili mori mbështetje edhe nga partitë e ekstremit të djathtë si Konfederata, ka arritur të unifikojë përkohësisht kampin e djathtë polak, duke e bërë fitoren e tij një moment kritik për të ardhmen politike të vendit dhe marrëdhëniet e tij me Bashkimin Evropian.