UNOC, liderët botërorë mblidhen në Nisë për emergjencën detare

Më shumë se 10.000 njerëz do të mblidhen në Francë për konferencën më të madhe ndonjëherë për oqeanet. Liderët botërorë do të mblidhen nesër në qytetin francez të Nisës për Konferencën e Kombeve të Bashkuara për Oqeanet.

Ndërsa oqeanet e botës përballen me kërcënime gjithnjë e më të mëdha nga ndryshimet klimatike, shfrytëzimi i tepruar i burimeve detare dhe ndotja, ekspertët kryesorë detarë po i bëjnë thirrje qeverive që ta shfrytëzojnë këtë mundësi për të mbrojtur ekosistemet e brishta nënujore, raporton euronews.

E planifikuar të zhvillohet nga data 9 deri më 13 qershor, kjo është samiti më i madh ndonjëherë i organizuar për oqeanet dhe mund të jetë një rast thelbësor për të finalizuar marrëveshje kyçe, për të përmbushur premtimet dhe për të bërë zotime të reja.

Çfarë është Konferenca e Kombeve të Bashkuara për Oqeanet (UNOC)?

E bashkëkryesuar nga Franca dhe Kosta Rika, konferenca synon të përballet me emergjencën globale në thellim për oqeanet. Shkencëtarët paralajmërojnë se ndryshimet klimatike, ndotja me plastikë, humbja e ekosistemeve dhe shfrytëzimi i tepërt i burimeve detare po e çojnë oqeanin drejt një pike pa kthim.

Në përpjekje për të nxitur bashkëpunimin dhe gjetjen e zgjidhjeve për disa nga këto probleme, UNOC po sjell së bashku liderë botërorë, shkencëtarë, aktivistë dhe biznese.

Në mënyrë të veçantë, fokusi i saj është zbatimi i Objektivit të 14-të për Zhvillim të Qëndrueshëm të OKB-së: “Jeta nën ujë”. Tema qendrore e kësaj konference është:
“Përshpejtimi i veprimit dhe mobilizimi i të gjithë aktorëve për ruajtjen dhe përdorimin e qëndrueshëm të oqeaneve.”

Kjo është konferenca e tretë e Kombeve të Bashkuara për Oqeanet, dhe pritet të marrin pjesë mbi 10,000 persona. Ndër liderët që do të marrin pjesë janë: Luiz Inácio Lula da Silva, presidenti i Brazilit, Emmanuel Macron, presidenti i Francës.