Britania sanksionon ministrat izraelitë

Qeveria britanike do të sanksionojë zyrtarisht dy ministra izraelitë të ekstremit të djathtë, Itamar Ben-Gvir dhe Bezalel Smotrich, pas sjelljes së tyre gjatë luftës në Gaza, raportoi Times të martën, sipas The Guardian.

Mbretëria e Bashkuar do ti bashkohet Kanadasë, Australisë, Zelandës së Re dhe vendeve të tjera në ngrirjen e aseteve dhe vendosjen e ndalimeve të udhëtimit për ministrin e sigurisë kombëtare të Izraelit, Ben-Gvir - një kolonist i Bregut Perëndimor - dhe ministrin e financave, Smotrich.

Muajin e kaluar, qeveria pezulloi bisedimet e tregtisë së lirë me Izraelin për ndjekjen e "politikave të ashpra" në Bregun Perëndimor dhe Gazën e pushtuar në mënyrë të paligjshme, thirri ambasadorin e saj dhe njoftoi sanksione të mëtejshme kundër kolonëve të Bregut Perëndimor.

Ministri i jashtëm i Mbretërisë së Bashkuar, David Lammy, i cili e quajti ofensivën e fundit të Izraelit "një fazë të re të errët në këtë konflikt", më parë ka dënuar komentet e Smotrich mbi pastrimin dhe shkatërrimin e mundshëm të Gazës dhe zhvendosjen e banorëve të saj në vendet fqinje.

Në Dhomën e Komunave, Lammy akuzoi kryeministrin e Izraelit, Benjamin Netanyahu, se "po planifikon të dëbojë banorët e Gazës nga shtëpitë e tyre në një cep të Rripit në jug dhe tu lejojë atyre një pjesë të ndihmës që u nevojitet".

“Ministri Smotrich foli madje për ‘spastrimin’ e Gazës nga forcat izraelite, ‘shkatërrimin e asaj që ka mbetur’, për zhvendosjen e banorëve palestinezë në vende të treta’,” tha Lammy. “Ne duhet ta quajmë këtë ashtu siç është. Është ekstremizëm. Është i rrezikshëm. Është i neveritshëm. Është monstruoz. Dhe unë e dënoj atë me termat më të forta të mundshme”.

Duke reaguar ndaj sanksioneve, Ministri i Jashtëm Izraelit Gideon Sa’ar tha se vendimi për të sanksionuar ministrat e tij ishte “i skandaloz”, duke shtuar se ai do ta diskutonte çështjen me Netanyahun javën e ardhshme për të “vendosur për përgjigjen tonë ndaj këtij vendimi të papranueshëm”.