Sporting ia mbyll derën Gyökeres

E ardhmja e Viktor Gyökeres po bëhet gjithnjë e më e ndërlikuar.

Sporting CP ka vendosur. Ka rënë dakord të negociojë transferimin e sulmuesit suedez me Arsenalin, Atlético Madridin dhe Manchester Unitedin, ndër të tjera, por jo me çdo çmim. 

“Mund të garantoj një gjë: Viktor Gyökeres nuk do të largohet për 60 milionë euro plus 10 milionë euro bonuse. 

Unë kurrë nuk e kam premtuar këtë”, tha presidenti Frederico Varandas për ‘O Jogo’.

"Me këtë manovër nga agjenti, situata vetëm sa po përkeqësohet," paralajmëroi presidenti i Sporting CP, i cili shkoi edhe më tej: "Kërcënimet dhe shantazhi nuk funksionojnë me mua." 

"Sporting nuk ka marrë asnjë ofertë për Viktor Gyökeres.

As këtë verë, as verën e kaluar", shtoi Varandas.

Në fakt, presidenti i Sporting CP po thekson lidhjen e suedezit me ‘Luanët’: "Gyokeres është një nga lojtarët më të mirë në historinë e futbollit portugez, një profesionist fantastik... dhe ai ka një kontratë tre-vjeçare." 

Kushdo që e dëshiron atë e di që do të duhet të investojë shumë. Performanca e tij ia vlen: ai e mbylli sezonin me 54 gola dhe 13 asiste në 52 ndeshje.