Allegri “blindon” Leaon dhe Saelemaekersin

Përveç ndonjë surprize të madhe nga merkatoja, ose ofertave të parefuzueshme, Milani po përgatitet të mbajë dy nga pjesët më të rëndësishme të projektit të ri: Rafael Leao dhe Alexis Saelemaekers.

Qëndrimi i dy lojtarëve të krahut është një kërkesë e qartë e trajnerit Allegri, i vendosur t’i bëjë protagonistë të epokës së re kuqezi.

Sa i përket portugezit, mesazhi ka qenë i qartë që në ditët e para të ardhjes së tij: Leao është në qendër të projektit të ri dhe Milani synon të rilindë pikërisht falë talentit të tij shkëlqyes, por ndonjëherë i zbehur.

Hipoteza e një largimi, të paktën për momentin, duket e largët, veçanërisht duke marrë parasysh se klubi kryesor i interesuar, Bayern Munich, tashmë është fokusuar te Nico Williams. Leao, pra, është thirrur të jetë drita udhëheqëse e sulmit të Milanit.

Alexis Saelemaekers do të kthehet te Milani me synimin e qartë për të treguar vlerat e tij. Pas një huazimi të mirë te Bologna dy sezone më parë dhe një kampionati shumë pozitiv te Roma në sezonin që sapo u mbyll, belgu do të rikthehet në “Milanello” si një lojtar më i fortë, më i plotë dhe, padyshim, shumë i dobishëm për kauzën kuqezi.

Massimiliano Allegri, i njohur për vlerësimin e lojtarëve të aftë, që luajnë në disa pozicione, nuk ka ndërmend ta lërë të largohet anësorin. Saelemaekers do të vlerësohet me shumë kujdes gjatë grumbullimit para-sezonal, siç shkruan sot “Corriere dello Sport”.