Zelensky: Putin nuk e ndalon luftën pa i humbur paratë

Presidenti rus Vladimir Putin nuk do të ndalet vetëm nga diplomacia dhe duhet të shënjestrohet financiarisht, deklaroi sot presidenti ukrainas Volodymyr Zelensky.

"Askush nuk ka qenë në gjendje ta ndalojë Putin. Vetëm Trump mbetet, ai mund të jetë në gjendje ta bëjë," tha Zelensky në një deklaratë të fuqishme, duke theksuar se çelësi për të ndaluar makinën e luftës së Rusisë qëndron në presionin ekonomik.

Ai bëri thirrje për zbatim më të rreptë të sanksioneve që synojnë sistemin bankar të Rusisë, flotën e saj të naftës në hije dhe komponentët ushtarakë, veçanërisht pasi rritja e çmimeve të naftës pjesërisht e nxitur nga tensionet në Lindjen e Mesme i siguron Moskës të ardhura kritike, raporton kp.

"Kufizimi i çmimit të energjisë ruse është kritik. Sanksionet janë të fuqishme, kur zbatohen. Ato kanë të bëjnë me ndalimin e rrjedhës së teknologjisë vdekjeprurëse," tha Zelensky.

Zelensky paralajmëroi se çdo shenjë e zbutjes së mbështetjes perëndimore do ta inkurajonte Moskën, transmeton Anadollu.

“Tani për tani, toni i dialogut SHBA-Rusi duket shumë i ngrohtë… Çdo sinjal për ndihmë të reduktuar, ose për trajtimin e Ukrainës dhe Rusisë si të barabarta, është thellësisht i padrejtë”, tha ai.

Udhëheqësi ukrainas gjithashtu hodhi poshtë propozimin e fundit të Moskës për paqe si një ultimatum të maskuar që shpërfill sovranitetin dhe kushtetutën e Ukrainës.

“Ajo që ofroi Rusia nuk është një plan paqeje. Është një ultimatum. Ukraina ka treguar se është e gatshme të bëjë gjithçka për paqen, gjithçka përveç dorëzimit”, tha Zelensky.