Dyshohet për rrahje të qytetarit pas shqiptimit të gjobës, kërkohet paraburgim për policin nga Prizreni

Prokuroria Themelore në Prizren ka njoftuar se ka kërkuar nga Gjykata Themelore në Prizren caktimin e masës së paraburgimit prej 30 ditësh për të dyshuarin R.P. zyrtar policor, i cili ndodhet aktualisht nën masën e ndalimit prej 48 orësh.

Sipas Prokurorisë, ndaj të dyshuarit ekziston dyshimi i bazuar se i njëjti ka kryer veprat penale “Keqtrajtimi gjatë ushtrimit të detyrës zyrtare ose autorizimeve publike” si dhe “Lëndimi i rëndë trupor”, në kundërshtim me nenet përkatëse të Kodit Penal të Republikës së Kosovës.

Ngjarja ka ndodhur më 14 qershor 2025, rreth orës 21:35, në rrugën “Ekrem Rexha” në Prizren, kur zyrtarët policorë R.P. dhe N.B., gjatë ushtrimit të detyrës, i kanë shqiptuar një gjobë për kundërvajtje të dëmtuarit S.F. për parkim të palejuar.

“Në atë moment, i dëmtuari, i cili ndodhej brenda një kafiterie afër vendit të ngjarjes, ka dalë jashtë dhe ka hedhur gjobën në tokë. Pas kësaj, zyrtarët policorë i kanë kërkuar të dëmtuarit të paraqesë dokument identifikimi, por ai nuk i është bindur urdhrit të tyre”,thuhet në njoftim.

Prokuroria sqaron se gjatë tentativës për arrestim, “i pandehuri i ka vendosur këmbën të dëmtuarit me qëllim të neutralizimit të rezistencës së tij,” dhe se kolegu i tij është rrëzuar së bashku me të dëmtuarin, duke rënë mbi të.

Më pas, “i pandehuri e ka goditur disa herë me grushte në pjesën e kokës, përkatësisht në zonën e syrit dhe të veshit të majtë, duke i shkaktuar lëndime trupore.”

Me këto veprime, sipas Prokurorisë, R.P. ka kryer veprat penale të lartcekura dhe ndaj tij është kërkuar masa e paraburgimit për të siguruar rrjedhën normale të procedurës penale.

“Prokuroria Themelore në Prizren, vazhdon të mbetet e përkushtuar në luftën ndaj kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligjin,” thuhet në fund të njoftimit.