Ambasadorja izraelite në Kosovë: Ja pse vepruam kundër Iranit

Përshkallëzimi i tensioneve mes Izraelit dhe Iranit ka rikthyer në fokus çështjen e sigurisë globale dhe balancës së brishtë në Lindjen e Mesme.

Në një intervistë ekskluzive, ambasadorja e parë e Izraelit në Kosovë, Tamar Ziv, flet hapur për operacionin ushtarak “Luani në Ngritje” të nisur nga Izraeli më 13 qershor, që sipas saj kishte për qëllim neutralizimin e kërcënimeve ekzistenciale nga Irani, përfshirë programin bërthamor dhe raketat balistike.

Ziv shpalos qëndrimin zyrtar të shtetit të saj, duke theksuar se sulmet izraelite kishin objektiva ushtarake. Ajo flet gjithashtu për ndikimin rajonal, përpjekjet për të shmangur një përshkallëzim më të gjerë dhe rolin e Kosovës në mbështetjen e qytetarëve të saj që ndodhen në Izrael.

Në intervistë, ambasadorja thekson se Irani përbën një kërcënim serioz për paqen ndërkombëtare, duke nënvizuar përfshirjen e tij në financimin dhe armatosjen e grupeve të ndryshme terroriste në rajon.

Telegrafi: Si e vlerësoni situatën aktuale të sigurisë pas përshkallëzimit të tensioneve midis Izraelit dhe Iranit?

Tamar Ziv: Në orët e para të së premtes, më 13 qershor, Shteti i Izraelit nisi Operacionin “Luani në Ngritje”, ( Operation Rising Lion ) që synonte të neutralizonte kërcënimin ekzistencial dhe të menjëhershëm nga programet e armëve bërthamore dhe raketave balistike të Iranit. Ky operacion synon konkretisht objektet ushtarake dhe komponentët kritikë të programit të armëve bërthamore të Iranit, si dhe individët kryesorë të përfshirë në programin bërthamor. Sulmet janë gjithashtu kundër infrastrukturës së lidhur me programin e raketave balistike të Iranit, i cili përbën një kërcënim të drejtpërdrejtë për Shtetin e Izraelit. Në vitet e fundit, regjimi radikal iranian i është përkushtuar shkatërrimit të Shtetit të Izraelit, si një direktivë detyruese. Regjimi vazhdimisht dhe publikisht bëri thirrje për shfarosjen e Shtetit të Izraelit. Gjatë viteve, regjimi ka investuar në një forcim masiv ushtarak për të realizuar qëllimin e tij për shkatërrimin e Izraelit. Regjimi ka zhvilluar një program të fshehtë të armëve bërthamore, si dhe një industri të madhe të raketave balistike, duke zhvilluar aftësinë e tyre për të arritur objektiva edhe 4,000 km larg. Raporti i IAEA-së deklaroi pak ditë më parë se pa dyshim programi bërthamor iranian nuk është menduar për qëllime paqësore. Ndërsa negocionte me SHBA-në, Irani në muajt e fundit ka prodhuar me shpejtësi uranium të pasuruar në nivel të lartë dhe ka përshpejtuar përpjekjet e tij klandestine për të zhvilluar armë bërthamore. Kjo po ndodhte ndërsa Irani po mashtronte sistematikisht bashkësinë ndërkombëtare. Irani është vetëm pak çaste larg një arme bërthamore dhe kjo nuk na la zgjidhje tjetër veçse të eliminonim kërcënimin para se të jetë tepër vonë.

Telegrafi: Çfarë ndikimi mund të ketë kjo situatë në stabilitetin e Lindjes së Mesme dhe në sigurinë globale në përgjithësi?

Tamar Ziv: Sipas mendimit tim, zvogëlimi ndjeshëm i objekteve bërthamore të Iranit dhe aftësisë së tij për të prodhuar armë bërthamore, si dhe aftësive të tij për të prodhuar dhe lëshuar raketa balistike, do të ndikojë ndjeshëm në situatën në Lindjen e Mesme. Në dekadat e fundit, që kur Regjimi Islamik mori pushtetin në Iran, dhe si pjesë e planit të tij për të shkatërruar Shtetin e Izraelit, Irani ka zhvilluar një rrjet të gjerë të grupeve terroriste që rrethojnë Izraelin. Irani i furnizon këta grupe me fonde, armë, duke përfshirë raketa dhe dronë të përparuar, si dhe financim ushtarak, trajnim dhe udhëzim. Këta grupe përfshijnë – Hamasin, Hezbollahun, milicinë Shiite në Irak, Huthët në Jemen dhe të tjerë, duke rrethuar kështu Izraelin me një “Unazë Zjarri”, në ndjekje të shkatërrimit të Izraelit. Që nga 7 tetori 2023, Izraeli ka dobësuar ndjeshëm Hamasin, Hezbollahun dhe tani Iranin. Regjimi sirian është ndryshuar si rezultat i këtyre ndryshimeve. Unë besoj se sa më të dobëta të jenë këto entitete ekstreme terroriste, aq më e madhe është mundësia e krijimit të një Lindjeje të Mesme që do të jetë më paqësore dhe e qëndrueshme.

Telegrafi: A jeni në kontakt me institucionet e Kosovës në lidhje me qytetarët kosovarë që ndodhen aktualisht në Izrael?

Tamar Ziv: Shefja e Misionit të Ambasadës së Kosovës në Jerusalem, znj. Ines Demiri, është në kontakt të drejtpërdrejtë me qytetarët kosovarë që ndodhen në Izrael, si dhe me Ministritë e Punëve të Jashtme të Izraelit dhe të Kosovës, dhe ata po ndihmojnë të gjithë qytetarët kosovarë që janë të interesuar të largohen nga vendi ose që kanë nevojë për lloje të tjera ndihme.

Telegrafi:  Sipas mendimit tuaj, cilat janë mënyrat e mundshme për të parandaluar përshkallëzimin e mëtejshëm të konfliktit midis Izraelit dhe Iranit?

Tamar Ziv: Sa më e dobët të bëhet infrastruktura iraniane e raketave dhe programi i armëve bërthamore, si dhe aftësitë ushtarake të IRGC-së (Forca e Gardës Revolucionare të Iranit), aq më e vogël është mundësia e përshkallëzimit të mëtejshëm. Ekziston një mundësi më e madhe për të arritur një marrëveshje që nuk do t’i mundësojë Iranit të zhvillojë përsëri këto infrastruktura dhe kështu të parandalojë përshkallëzimin e konfliktit.

Telegrafi: Cili pritet të jetë qëndrimi i Izraelit në ditët në vijim?

Tamar Ziv: Izraeli do të vazhdojë të veprojë në Iran derisa programi bërthamor i Iranit të dëmtohet ndjeshëm, si dhe prodhimi dhe aftësitë e lëshimit të raketave balistike të shkatërrohen ndjeshëm. Ndryshe nga Irani që po i drejton raketat e tij vdekjeprurëse drejt popullsisë civile, Izraeli po synon vetëm objektet ushtarake, si dhe komponentët e programit bërthamor dhe raketor. Ne nuk kemi zgjidhje tjetër veçse të mbrojmë sigurinë tonë dhe vetë ekzistencën tonë. Unë besoj se operacioni ynë ushtarak do të kontribuojë në një Lindje të Mesme më të qëndrueshme duke parandaluar Iranin të vazhdojë të destabilizojë rajonin dhe më gjerë. Irani përbën një kërcënim serioz për paqen dhe sigurinë ndërkombëtare.