Milan-Bayer Leverkusen, sot kontakte direkte për transferimin e Xhakës

Granit Xhaka, lideri i mesfushës së Bayer Leverkusen dhe kapiteni i përfaqësueses së Zvicrës, është bërë sërish një emër i nxehtë në tregun e transferimeve verore. Pas një sezoni fantastik me ekipin e Xabi Alonsos, spekulimet për një kalim të mundshëm në Serie A po bëhen gjithnjë e më serioze.

Sipas gazetarit Fabrizio Romano, AC Milan ka hyrë në kontakte me Bayer Leverkusen për të eksploruar mundësinë e transferimit të Xhakës. Edhe pse ende nuk ka një ofertë zyrtare, palët kanë nisur bisedime fillestare, përcjellë KosovaPress.

“Milan po vlerëson disa opsione për të përforcuar mesfushën. Granit Xhaka është një nga emrat në listë. Ka kontakte me përfaqësuesit e lojtarit dhe vlerësime të brendshme mbi koston e transferimit.”

Bayer Leverkusen nuk ka shfaqur ende vullnet për të larguar Xhakën, i cili është nën kontratë deri në vitin 2028. Megjithatë, raportime nga “Sky Germany” dhe “Bavarian Football Ëorks” sugjerojnë se një ofertë në kufijtë 15-20 milionë euro mund të bindë klubin gjerman, sidomos nëse Xhaka kërkon vetë largimin.

Nuk është hera e parë që Xhaka lidhet me një transferim në Itali. Në të kaluarën, Roma e Jose Mourinhos ishte shumë pranë ta afronte mesfushorin në vitin 2021, kur ai ende ishte pjesë e Arsenalit. Vetë lojtari e kishte konfirmuar se "ishte shumë afër transferimit", por marrëveshja u prish në momentet e fundit.