Treshja e Interit mund të rikthehet për ndeshjen ndaj River Plate

Treshja e lënduar e Interit, Denzel Dumfries, Marcus Thuram dhe Davide Frattesi, mund të jenë të disponueshëm për përzgjedhje nga Cristian Chivu për ndeshjen e fundit të fazës së grupeve të Nerazzurrëve në Kupën e Botës për Klube kundër River Plate.

“Interi mund të rikuperojë disa lojtarë për ndeshjen kundër River Plate, veçanërisht Dumfries, Thuram dhe Frattesi.

Nuk pres që ata të fillojnë, por mund të jenë të disponueshëm”, tha gazetari i SkySport, Matteo Barzaghi.

Interi ishte pa treshen kyçe kur siguroi një fitore 2-1 kundër Urawa Red Diamonds të shtunën në mbrëmje, me dy gola të vonë nga Lautaro Martinez dhe Valentin Carboni që bënë diferencën pasi skuadra japoneze i rezistoi dominimit të Nerazzurrëve për periudhën e madhe të ndeshjes.

Kjo do të thotë që skuadra e Chivu-së renditet e dyta në grupin e saj për nga diferenca e golave, me pikë të barabarta me River Plate-n, e cila barazoi me Monterrey-n në orët e para të mëngjesit të së dielës.