Qëllimi është që shuma të paguhet më 1 ose 2 korrik

Barcelona e ka marrë tashmë vendimin për ta transferuar Nico Williams, por nuk do ta ekzekutojë pagesën e klauzolës së tij të lirimit deri në muajin korrik. Bëhet fjalë për një operacion strategjik, i kushtëzuar nga arsye kontabël.

Klubi blaugrana dëshiron që pagesa prej 58 milionë eurosh, plus indeksimi i çmimeve (IPC), të përfshihet në bilancin financiar të sezonit 2025-2026, i cili nis më 1 korrik.

Qëllimi është që shuma të paguhet më 1 ose 2 korrik.

Megjithëse pritet kjo datë zyrtare, synimi i Barçës është t’i mbyllë të gjitha detajet e marrëveshjes përpara se sulmuesi i krahut të bashkohet me fazën përgatitore të Athletic Bilbaos.

Skuadra baske e ka planifikuar fillimin e stërvitjeve në Lezama për javën e dytë të korrikut.

Objektivi në “Can Barça” është që lojtari të jetë nën urdhrat e Hansi Flick që nga fillimi i përgatitjeve, të parashikuara më 13 korrik, edhe pse Nico Williams, pas angazhimit në “Nations League” me Spanjën, do të bashkohet disi më vonë, njësoj si lojtarët e tjerë ndërkombëtarë.

Për këtë qëllim, siç ka raportuar edhe “Mundo Deportivo”, përfaqësuesit e lojtarit po ndërmjetësojnë me Athletic për të arritur një marrëveshje që të lejojë pagesën e klauzolës me këste, në vend të pagesës në një të vetme, siç parashikon zakonisht procedura ligjore për klauzolat e lirimit në Spanjë.

Duhet kujtuar se verën e kaluar, Nico refuzoi oferta të rëndësishme, përfshirë atë të vetë Barcelonës, duke vendosur të qëndrojë në Bilbao për ta ndihmuar klubin në përpjekjen për të fituar “Europa League”, pasi finalja luhej në “San Mamés”, një gjest i madh për klubin bask. Pikërisht për këtë arsye, Athletic mund t’ia kthejë nderin futbollistit, nëse ky i fundit vendos të largohet këtë verë.

Oferta e Barçës e tërheq futbollistin, por duke parë marrëdhëniet e ftohta aktuale mes Athletic dhe katalanasve, nuk duket e lehtë arritja e një marrëveshjeje që do ta bënte transferimin të dobishëm për të gjitha palët.

Gjithsesi, Barcelona është e përgatitur edhe për ta paguar menjëherë të gjithë shumën e klauzolës në korrik. Ndërkohë, drejtuesit katalanas po punojnë për të liruar hapësirë në buxhetin e pagave, me qëllim që të mund ta regjistrojnë lojtarin në fjalë pa pengesa.