Valon Behrami kthehet te skuadra angleze me rol të ri

Drejtori sportiv i Watfordit, Gian Luca Nani, pritet të tërhiqet nga roli i tij në klubin italian Udinese Calcio nëse përfundon shitja e këtij klubi, i cili po ashtu është në pronësi të familjes Pozzo.

Skuadra e Serie A konfirmoi dje se Nani do të vazhdojë detyrën e tij të dyfishtë si drejtor teknik i grupit për sezonin e ardhshëm, përkrah drejtorit teknik të Udineses, mesfushorit të njohur zviceran në pension, Gökhan Inler.

Një njoftim i tillë mund të ketë habitur disa tifozë, duke pasur parasysh që negociatat për shitjen e klubit tek fondi amerikan i investimeve “Guggenheim Partners” janë ende në vazhdim.

Megjithatë, sipas “Watford Observer”, pronari Gino Pozzo po vazhdon me qasjen “gjithçka si zakonisht” derisa të arrihet një marrëveshje përfundimtare.

Nëse marrëveshja mbyllet, atëherë pritet që Nani të largohet nga përfshirja e tij me Udinesen.

Drejtori 62-vjeçar tashmë po punon në Londër me ndihmësin e tij të ri – dhe ish-shokun e Inlerit nga Kombëtarja e Zvicrës – Valon Behrami.

Ish-mesfushori i njohur është rikthyer në klubin ku luajti nga viti 2015 deri në 2017 dhe do të jetë urë lidhëse me lojtarët, ndërsa Nani do të fokusohet në çështjet teknike dhe rekrutimin.

Të dy, Nani dhe Behrami, iu drejtuan skuadrës dhe stafit teknik përpara prezantimit të trajnerit të ri Paulo Pezzolano, kur ekipi u rikthye në stërvitje për fazën përgatitore.

Nani u emërua në rolin e grupit në qershor të vitit të kaluar, por theksoi që në atë kohë se do të vazhdonte të punonte për Watfordin.

Nani fillimisht ishte pjesë e Watfordit kur familja Pozzo e bleu klubin në vitin 2012, pasi kishte bashkëpunuar më herët me kryetarin dhe CEO-n Scott Duxbury te West Ham.

Ai u largua para fillimit të sezonit 2014/15, por u rikthye në fund të vitit 2023, pas largimit të paraardhësit të tij, Cristiano Giaretta.

Ndërkohë, nuk është ende e qartë nëse ka ndonjë simbolikë më të thellë në faktin që Behrami dhe Inler kanë role të ngjashme te Watford dhe Udinese, por është evidente që Gino Pozzo e vlerëson shumë Behramin. Ai e kishte transferuar si lojtar më parë dhe tani e ka emëruar në një rol teknik.

Behrami, i cili është paraqitur 83 herë për Zvicrën dhe ka marrë pjesë në katër Kupa Botërore radhazi, e nisi karrierën te Lugano, Genoa dhe Lazio, para se të kalonte në Premier League me West Ham në vitin 2008.

Më pas luajti në Serie A për Fiorentinën dhe Napolin, në Gjermani, dhe në fund iu bashkua Watfordit në vitin 2015, ku zhvilloi 49 ndeshje për klubin. Ai u largua drejt Udineses në vitin 2017.