Arsenali nuk dorëzohet për yllin spanjoll, gati oferta e dytë për transferimin e tij

Arsenali pritet të përmirësojë ofertën e tyre për mbrojtësin e Valencias, Cristhian Mosquera, në orët në vijim, pasi një ofertë prej 15 milionë eurosh u refuzua gjatë fundjavës. 

Sipas gazetës spanjolle Superdeporte, ‘Topçinjtë’ kanë arritur tashmë marrëveshje personale me qendërmbrojtësin 19-vjeçar dhe e kanë përcaktuar si përforcimin e dëshiruar për të shtuar thellësi në repartin defensiv këtë verë. 

Valencia e ka refuzuar ofertën fillestare, por Arsenali është i vetëdijshëm se një shumë prej rreth 20 milionë eurosh mund të mjaftojë për të përfunduar marrëveshjen. 

Mosquera ka edhe një vit të mbetur në kontratë, dhe klubi spanjoll është i hapur për ta shitur nëse oferta është e duhur. 

Drejtori sportiv i Arsenalit, Andrea Berta, po udhëheq personalisht negociatat dhe pritet të paraqesë ofertën e re shumë shpejt. 

Nga ana tjetër, Valencia nuk ka bërë ndonjë përpjekje të madhe për ta mbajtur Mosqueran, pasi lojtari nuk ka marrë ende ndonjë propozim për rinovim. 

 Thuhet se klubi po pret ardhjen e pronarit të ri, Ron Gourlay, në korrik, për të vendosur mbi të ardhmen e tij./