Franca dhe Zvicra mbyllin centralet bërthamore për shkak të valës së të nxehtit përvëlues

Për shkak të një vale të nxehtë përvëluese që është përhapur në të gjithë Evropën ditët e fundit, një numër termocentralesh bërthamore në Zvicër dhe Francë janë detyruar ose të zvogëlojnë aktivitetin ose të mbyllen plotësisht, pasi temperaturat ekstreme i kanë penguar vendet të mbështeten në ujin nga lumenjtë lokalë.

Për t’u ftohur, termocentralet bërthamore pompojnë ujë nga lumenjtë lokalë ose deti, të cilin më pas e lëshojnë përsëri në trupat ujorë me një temperaturë më të lartë.

Megjithatë, vala e vazhdueshme e nxehtësisë në Evropë do të thotë që uji i pompuar nga termocentralet bërthamore është tashmë shumë i nxehtë, duke ndikuar në aftësinë e termocentraleve bërthamore për ta përdorur atë për t’u ftohur.

Për më tepër, termocentralet bërthamore rrezikojnë të paraqesin një kërcënim të rrezikshëm për biodiversitetin lokal, duke lëshuar ujë shumë të nxehtë në lumenj dhe dete.

Në dritën e të nxehtit, Axpo – e cila operon centralin bërthamor Beznau në Zvicër – tha se kishte mbyllur një nga reaktorët e saj, duke shtuar se një reaktor i dytë po funksiononte me kapacitet të kufizuar, shkruan euronews, përcjell Telegrafi.

“Për shkak të temperaturave të larta të ujit të lumit, Axpo ka ulur gjithnjë e më shumë prodhimin e dy njësive të reaktorit në termocentralin bërthamor Beznau për ditë të tëra dhe e uli atë në 50% të dielën”, tha operatori.

Bëhet e ditur se reaktorët e termocentralit bërthamor Beznau ndodhen direkt në lumin Aare, ku temperaturat kanë arritur 25 gradë Celsius në ditët e fundit, duke e detyruar Axpo të kufizojë aktivitetet e saj për të parandaluar “ngrohjen e tepërt të ujit tashmë të ngrohtë”, e cila mund të dëmtojë biodiversitetin lokal.

Ndryshe, edhe pse Zvicra ka vendosur të heqë gradualisht energjinë bërthamore deri në vitin 2033, termocentralet ekzistuese janë në gjendje të vazhdojnë të funksionojnë për sa kohë që janë të sigurta.

Ndërkohë, kompania franceze e energjisë elektrike EDF mbylli termocentralin bërthamor Golfech, të vendosur në departamentin jugor të Tarn-et Garonne, mes paralajmërimeve për nxehtësi ekstreme në rajon dhe shqetësimeve se lumi lokal mund të nxehet.

Raportohet se Franca ka gjithsej 57 reaktorë bërthamorë aktivë në 18 termocentrale.

Sipas EDF, vendi merr rreth 65% të energjisë elektrike nga energjia bërthamore, të cilën qeveria e konsideron miqësore me mjedisin.

Prodhimi është zvogëluar edhe në vende të tjera, duke përfshirë termocentralin bërthamor Blayais në Francën perëndimore, si dhe termocentralin bërthamor Bugey në Francën jugore, i cili gjithashtu mund të mbyllet.