Arsenali zyrtarizon transferimin

Arsenali ka përfunduar transferimin e mesfushorit spanjoll Martin Zubimendi nga Real Sociedad, në një marrëveshje me vlerë rreth 60 milionë funte.

Ky është përforcimi i dytë i “Topçinjve” këtë verë, pas transferimit të portierit Kepa Arrizabalaga nga Chelsea për 5 milionë funte.

Zubimendi, 26 vjeç, kishte refuzuar një ofertë nga Liverpooli verën e kaluar. Ai është rritur në akademinë e Real Sociedadit dhe ka bërë 236 paraqitje për ekipin e parë, duke shënuar 10 gola. Ai ka nënshkruar kontratë pesëvjeçare me Arsenalin.

Sezonin e kaluar ishte pjesë e ekipit që u eliminua nga Manchester United në Europa League me rezultat 4-1 në Old Trafford. Sociedad e mbylli sezonin në vendin e 11-të në La Liga.

Zubimendi ishte gjithashtu pjesë e kombëtares spanjolle që fitoi Euro 2024, duke hyrë në lojë në pjesën e dytë të finales kundër Anglisë, në vend të Rodrit. Goli i Mikel Oyarzabal i solli trofeun Spanjës.

Me 19 paraqitje me Spanjën, Zubimendi është bërë titullar i rregullt për shkak të mungesës së Rodrit që vuajti një dëmtim serioz në gju sezonin e kaluar. Ai shënoi edhe në finalen e Ligës së Kombeve ndaj Portugalisë, që Spanja e humbi me penallti.

Arsenali gjithashtu ka arritur marrëveshje me Brentfordin për transferimin e mesfushorit Christian Norgaard, për një shumë fillestare prej 10 milionë funte.