Makelele, i bindur: PSG do e kishte fituar Champions edhe me Mbappe

Në prag të gjysmëfinales së Kupës së Botës për Klube midis Paris Saint-Germain dhe Real Madrid, Claude Makélélé e drejtoi vëmendjen te ish-lojtari i madh i mbrëmjes: Kylian Mbappé. Për ish-mesfushorin e të dyja skuadrave (dhe të Chelseat, një tjetër gjysmëfinalist), lamtumira e sulmuesit francez nuk e ka ndryshuar fatin e klubit parizien:

“PSG do ta kishte fituar Champions League gjithsesi edhe nëse Mbappé do të kishte qëndruar. Nuk mund t’i thuash jo Real Madridit, dhe kjo është arsyeja pse ai vendosi të largohet”, tha ai.

Mbappé u largua nga PSG në verën e vitit 2024 dhe fati deshi që klubi parizien të arrinte më në fund triumfin e parë evropian pa të. “Nëse e ardhmja ime do të varej nga Champions League, pa munguar respekti për PSG-në, do të isha larguar shumë më herët”, tha lojtari në mars të vitit 2023.

Fjalë që sot tingëllojnë si shaka, marrëdhënia midis klubit dhe lojtarit, e acaruar në muajt e fundit të bashkëjetesës, është në nivelin më të ulët pas ndarjes edhe për shkak të kërkesës për pagesën e 55 milionë eurove në paga dhe bonuse të prapambetura.

Ndërsa PSG më në fund e ka ngritur Kupën me veshë të mëdhenj, Mbappé ka mundësinë për një hakmarrje të vogël.

“PSG ka pasur një sezon të jashtëzakonshëm dhe e meritoi Champions League”, përfundoi Makélélé. “Por kini kujdes nga Reali, në një ndeshje të vetme ata mund të përmbysin të gjitha parashikimet”.