Tre burra shpallen fajtorë për zjarrvënie në një depo në Londër, në emër të grupit rus Wagner

Tre burra janë shpallur fajtorë për një sulm zjarrvënës në një depo në Londër, e lidhur me ndihmat për Ukrainën, i kryer në emër të grupit mercenar rus Wagner.

Jakeem Rose (23 vjeç), Ugnius Asmena (20 vjeç), dhe Nii Mensah (23 vjeç) u shpallën fajtorë në Gjykatën e Lartë (Old Bailey) për zjarrëvënie me qëllim rrezikimin e jetës, pas sulmit që ndodhi më 20 mars 2024 në një njësi magazinimi në Leyton, në lindje të Londrës. Depoja dërgonte ndihma humanitare dhe pajisje satelitore Starlink për Ukrainën.

Sulmi u organizua nga Dylan Earl (20 vjeç) dhe Jake Reeves (23 vjeç), të cilët kishin pranuar më parë se kishin planifikuar zjarrvënien për llogari të grupit Wagner, i shpallur organizatë terroriste nga qeveria britanike.

Zjarri shkaktoi dëme që arrinin në rreth 1 milion paund. Tetë ekipe zjarrfikësish dhe rreth 60 zjarrfikës ndërhynë për të shuar flakët. Ndërkohë, një shofer kamioni u përpoq ta shuante zjarrin pa sukses.

Pamjet e sigurisë dhe një video e transmetuar drejtpërdrejt në FaceTime treguan Mensah dhe Rose duke hedhur benzinë dhe duke i vënë flakën magazinës. Gjatë ikjes, Rose hodhi një thikë mbi të cilën u gjet ADN-ja e tij.

Depoja ishte në pronësi të shtetasve ukrainas dhe u shënjestrua për shkak të rolit të saj në dërgimin e ndihmave në Ukrainë. “Ky ishte një sulm i qëllimshëm për shkak të lidhjes së depos me Ukrainën,” tha David Cawthorne nga Prokuroria e Kurorës.

Dylan Earl, i cili kishte komunikuar me një kontakt të Wagner-it përmes aplikacionit Telegram, kishte shprehur gatishmërinë për të kryer “misione” të tjera, përfshirë sulme të planifikuara në një restorant dhe dyqan vere në Mayfair, si dhe një komplot për rrëmbimin e biznesmenit dhe disidentit rus Evgeny Chichvarkin, një kritik i njohur i Vladimir Putinit.

Earl u bë personi i parë i dënuar sipas Aktit të Sigurisë Kombëtare 2023, i miratuar për të trajtuar kërcënimet nga shtetet e huaja.

Paul English (61 vjeç) u shpall i pafajshëm për përfshirje në zjarrvënie. Ashton Evans, nga Newport, u shpall fajtor për moszbulim informacioni në lidhje me aktet terroriste, por u lirua nga akuza për mosnjoftim të zjarrvënies.
Dmitrijus Paulauskas, nga Croydon, u shpall i pafajshëm për të gjitha akuzat.

Komandanti Dominic Murphy nga Komanda Kundër Terrorizmit tha: “Ky rast tregon qartë se si një organizatë e lidhur me shtetin rus ka përdorur përfaqësues britanikë për të kryer vepra të rënda kriminale në Mbretërinë e Bashkuar. Shpresoj që këto dënime të shërbejnë si paralajmërim për pasojat serioze të veprimeve në emër të një shteti të huaj.”