Mbappe befason të gjithë

Në prag të gjysmëfinales së shumëpritur të Botërorit për Klube mes Real Madrid dhe Paris Saint-Germain, Kylian Mbappé ka surprizuar të gjithë me një postim të pazakontë në Instagram. Sulmuesi francez ka publikuar një foto ku shfaqet me fanellën e PSG-së, i kthyer me shpinë, në një imazh të realizuar në “Parc des Princes”.

Pa asnjë përshkrim, vetëm një mesazh simbolik që ka ngjallur reagime dhe emocione – një sinjal i qartë në vigjilje të përballjes së parë të tij kundër ish-klubit.

Mbappe iu bashkua PSG-së në vitin 2017 nga Monaco për 180 milionë euro dhe shkroi historinë e klubit me 256 gola në 308 ndeshje, duke u bërë golashënuesi më i mirë i të gjitha kohërave për parizienët.

Por largimi i tij në verën e vitit 2024 nuk ishte aspak i qetë: refuzimi për të rinovuar kontratën dhe mospërdorimi i opsionit për një vit shtesë shkaktuan përplasje me drejtuesit e klubit.

Këto tensione kulmuan me përjashtimin e tij nga turneu veror dhe një sezon të pazakontë, ku mungesa e disa pagesave kontribuoi në një situatë delikate. Sot, Mbappé ka nisur një proces ligjor për të kërkuar rreth 55 milionë euro në shpërblime dhe paga të prapambetura.

Të gjitha këto zhvillime shtojnë edhe më shumë emocionin për ndeshjen e madhe që pritet të ofrojë jo vetëm spektakël sportiv, por edhe ngarkesë emocionale të veçantë.