Adeyemi pritet të transferohet në Serie A

Karim Adeyemi është sërish në qendër të spekulimeve të afatit kalimtar. Sulmuesi i Borussia Dortmund, i cili ka pasur paraqitje të mira me momente të vështira, ishte pranë një largimi gjatë dimrit dhe tani në Serie A ka rifilluar interesimin për të.

Borussia Dortmund është e njohur për mënyrën si zhvillon dhe më pas shet me fitim lojtarët e saj më premtues.

Një nga ata është edhe Adeyemi, 23-vjeçari që posedon shpejtësi, teknikë dhe potencial të madh në fazën ofensive.

Edhe pse është kritikuar për mungesë konsistence, talenti i tij nuk vihet në dyshim. Kjo e bën atë një profil tërheqës për shumë klube që kërkojnë të forcojnë sulmin këtë verë.

Sipas “La Gazzetta dello Sport”, Juventusi ka rikthyer interesimin për Adeyemin. Zonja e Vjetër kishte tentuar ta transferonte edhe në afatin dimëror, por tani duket më e vendosur për të realizuar marrëveshjen.

Sulmuesi i Dortmundit vlerësohet rreth 45 milionë euro, një shumë që konsiderohet brenda mundësive të Juventusit. Megjithatë, klubi italian duhet të veprojë shpejt për të mos humbur sërish objektivin.

Borussia Dortmund është e hapur për bisedime dhe e gatshme të dëgjojë oferta, veçanërisht nëse Adeyemi dëshiron të provojë një sfidë të re jashtë Gjermanisë. Serie A shihet si një destinacion potencial për të.

Ndërkohë, merkatoja verore sapo ka nisur dhe gara për nënshkrimin e Adeyemit mund të ashpërsohet në javët e ardhshme, me më shumë klube që mund të përfshihen në luftën për sulmuesin gjerman.