Shqiptarja që i bëri të gjithë zviceranët të festojnë! Ja arsyeja

Stadiumi i Gjenevës nuk do ta harrojë kurrë këtë moment: minuta e 92-të,

Zvicra është një hap larg eliminimit, Finlanda në avantazh dhe ëndrra për çerekfinalet po shuhet.

Por në atë moment, gjithçka ndryshoi falë një vajze 22-vjeçare me rrënjë shqiptare, Riola Xhemaili.

Geraldine Reuteler dërgon një kros perfekt në zonë. Riola, që vetëm dhjetë minuta më parë ishte futur në lojë, gjendet aty ku duhet.

Një prekje, një goditje e saktë dhe topi përfundon në rrjetë. 1:1 – dhe stadiumi shpërthen! Zvicra, për herë të parë në histori, kalon në çerekfinale të Kampionatit Evropian për femra.

“Goli që do të mbetet përgjithmonë në historinë e futbollit zviceran”, shkroi “20 Minuten”.

Dhe me të drejtë, sepse nuk është vetëm një gol, por një simbol shprese dhe besimi.

Për Riolën, ky gol është më shumë se një statistikë.

Është shpërblimi për muaj të tërë të vështirë. Edhe pse shkëlqeu me PSV Eindhoven në Holandë – 14 gola dhe 6 asistime – nuk ishte gjithmonë pjesë e planeve të trajneres Pia Sundhage. Nuk u ftua në disa grumbullime, u la jashtë, u la në pritje.

Dhe pastaj – kur askush nuk e priste – ajo u bë heroinë.

“Kam dashur të vrapoj drejt tifozëve, por kishte një rrethojë… nuk doja të rrëzohesha,” tha Riola duke qeshur, disa minuta pasi shkroi historinë. “Është ndjenja më e mirë që kam ndjerë ndonjëherë. Është një ëndërr e bukur që u bë realitet.”

Ajo e dinte. E ndjente. “E kam ditur se do ta shënoj atë gol. Thjesht duhej të mos isha në ofsajd. Pasi erdhi topi, e dija ku duhej të isha.”

Në një natë të veçantë për sportin, Zvicra festoi – në stadium ishin mbi 26 mijë tifozë, përpara ekranit më shumë se 1 milion shikues. Në çdo qytet të Zvicrës pati festë, entuziazëm dhe krenari. Dhe në zemër të këtij momenti ishte një vajzë shqiptare që nuk u dorëzua kurrë.

“Shumë kanë dyshuar tek unë. Por tregova pse jam këtu, tregova që mund ta ndihmoj këtë ekip,” tha ajo mes emocioneve.

Kapitenia Lia Walti e përmblodhi më së miri: “Rio ka diçka që të tjerat nuk e kanë – bën gjëra që nuk i pret kush. Jam jashtëzakonisht krenare për të.”

Zvicra vazhdon ëndrrën. Dhe falë Riola Xhemailit, një vend i tërë beson se gjithçka është e mundur.