Barcelona merr vendimin për Fermin Lopez

Barcelona ka marrë një vendim lidhur me të ardhmen e menjëhershme të mesfushorit Fermín Lopez, i cili ka qenë në radarin e gjigantëve të Ligës Premier, Chelsea. 

Barcelona ndodhet në një situatë të vështirë financiare dhe ka nevojë urgjente për të arkëtuar nga shitjet e lojtarëve në mënyrë që të rikthehet te rregulli financiar 1:1 i La Ligas. 

 Për këtë arsye, janë përfolur për largim emra si Ronald Araujo, Andreas Christensen, Marc-Andre Ter Stegen dhe Lopez. 

Megjithatë, katalanasit kanë bërë të qartë qëndrimin e tyre sa i përket të ardhmes së mesfushorit të ri, pavarësisht interesimit të madh nga Europa dhe Arabia Saudite. 

Sipas një raporti nga AS, Barça ka vendosur që Lopez nuk është në shitje këtë verë, edhe pse Chelsea ka shprehur gatishmërinë për të paguar 75 milionë euro. 

Trajneri Hansi Flick e konsideron mesfushorin e dalë nga akademia La Masia si një pjesë të pazëvendësueshme të skuadrës dhe do të vazhdojë të llogarisë në të për sezonin 2025/2026. 

Nga ana tjetër, vetë Lopez është i kënaqur me rolin e tij aktual te kampionët e Spanjës dhe është i vendosur të qëndrojë në Kataloni. 

Lopez ka impresionuar me paraqitjet e tij për Barçën, edhe pse nuk ka qenë titullar i rregullt. Ai ka fituar reputacionin si një mesfushor që shfaqet rrezikshëm në zonë dhe me etje për të shënuar gola. 

Këto paraqitje kanë tërhequr vëmendjen e klubeve në Europë dhe më gjerë. Përveç Chelsea, edhe Bayern Munich thuhet se po e ndjek situatën e spanjollit. 

Gjithashtu, edhe Al-Ahli raportohet se kanë bërë një ofertë të madhe për të, ndërsa edhe Interi është lidhur me 22-vjeçarin.