Gjendet pas 36 orësh vogëlushi 5-vjeçar në Itali! Qëndroi i strehuar pranë një shtylle betoni

Allen Ganao, 5-vjeçari, i zhdukur që prej të premtes në mbrëmje nga kampingu “Por la Mar” në zonën Latte të Ventimiglias, u gjet i gjallë mëngjesin e së dielës pas një operacioni të madh kërkimi.

Fëmija i zhdukur në Ventimiglia gjendet gjallë pas 36 orësh kërkimesh

Ai ishte shumë i dehidratuar, por në gjendje të mirë shëndetësore. Fëmija u gjet i vetëm, në këmbë, rreth tre kilometra larg vendit ku ishte zhdukur, pranë një ndërtese të vogël afër një antene telefonike në pyll.

Ai kaloi dy net i vetëm dhe i strehuar pranë një shtylle betoni. Zbulimi u bë nga një banor lokal, ndërsa shpëtimi u krye nga një ekip vullnetarësh të mbrojtjes civile.

Babai i Allen, Bernardo Ganao, falënderoi të gjithë ata që morën pjesë në kërkime: “Ishim të frikësuar; këto ishin ditë të tmerrshme. Gjithçka shkoi mirë. Jemi të lehtësuar dhe shumë të lumtur.” Në një video të publikuar në rrjete sociale shihet përqafimi i parë mes fëmijës dhe nënës së tij në pyll.

Tre shpëtimtarët që gjetën djalin – Matteo Trecci, Edoardo Campione dhe Dario Mattaudi – u pritën si heronj në vendin ku u kthye Allen, mes duartrokitjeve të turmës.

Prefekti i Imperias, Valerio Massimo Rome, tha se kërkimet fillestare kishin qenë të pasuksesshme pavarësisht përfshirjes së dy helikopterëve, dronëve dhe pajisjeve zanore. Prindërit madje përdorën këngë për ta tërhequr djalin.