Të shtënat pranë centralit bërthamor në Ukrainë, agjencia e OKB: Të papranueshme!

Agjencia Ndërkombëtare për Energjinë Atomike (IAEA) ka raportuar për një incident shqetësues në centralin bërthamor të Zaporizhias, Ukrainë, mbrëmjen e së shtunës të 12 korrikut. Ekipet në terren dëgjuan “qindra të shtëna me armë” përreth impiantit, një ngjarje e cilësuar si “e papranueshme” nga zyrtarët ndërkombëtarë.

Sipas IAEA, të shtënat u dëgjuan për rreth një orë, duke nisur nga ora 22:00 me orën lokale. Gjatë kontrollit të mëngjesit, ekspertët zbuluan gëzhoja pranë dy njësive reaktore, duke konfirmuar praninë e aktivitetit të pazakontë ushtarak.

Drejtori i përgjithshëm i IAEA, Rafael Grossi, deklaroi se “çdo lloj aktiviteti ushtarak në apo pranë një central bërthamor është qartësisht i papranueshëm”.

Incidenti ndodhi pas disa raportimeve të fundit për sulme me dron dhe tensione të tjera në zonën e Enerhodarit, qyteti ku jeton pjesa më e madhe e stafit të centralit.

Ekspertët paralajmërojnë se situata në Zaporizhia mbetet delikate, ndërkohë që apelojnë për de-përshkallëzim të menjëhershëm dhe masa të shtuara sigurie.